«Երանի թե ինչ-որ բան խոչընդոտեր Հայաստանի անդամակցությանը Մաքսային միությանը»,- «Առաջին լրատվական»-ի հետ զրույցում ասաց ԱԻՄ առաջնորդ Պարույր Հայրիկյանը՝ անդրադառնալով ՄՄ «ճանապարհային քարտեզի» ստորագրման ժամանակ Ղազախստանի նախագահ Նորսուլթան Նազարբաևի հայտարարություններին:
«Եթե անգամ ոչ ՄՄ-ի միջոցով, ՀՀ իշխանությունները հստակ որդեգրել են Ռուսաստանի ճորտն ու հարճը դառնալու ուղին: Եթե ինչ-որ բան պետք է անենք, ապա մենք հայերս պետք է անենք»,- ընդգծեց Հայրիկյանը:
Հարցին՝ եթե կախված է մեզանից, ապա ինչո՞ւ մեզ մոտ Ուկրաինայի նման ընդվզում չեղավ, մեր զրուցակիցը պատասխանեց․ «Ուկրաինայի և մեր տարբերությունը միլիոններով չէ, մի 10 անգամ ավել է իրենց մոտ: Այսպիսի դեպքում մեկի դրսևորումը կարող է հավասարազոր լինել հազարների դրսևորմանը: Կարևորը, որ Հայաստանում ընդվզողներ կան հենց առաջին օրվանից: Կարևոր է, որ անհատ քաղաքացիներ, նաև հասարակական կազմակերպություններ իրենց դիրքորոշումը հստակ այս հարցում ցույց են տվել: Մեր անցկացրած երկու հարցումներն էլ ցույց են տվել, որ հայ ժողովրդի մեծ մասը, չնայած պետական քարոզչությանը, ձգտում է Եվրոպայի հետ համագործակցելուն»:
Նախագահի նախկին թեկնածուն անդրադարձավ նաև ՀՀ երկրորդ նախագահ Ռոբերտ Քոչարյանի վերջին հարցազրույցին և այն տեսակետներին, թե նա կարող է իր շուրջը համախմբել Հայաստանի ռուսաստանամետ ուժերին․ «Նրանք իրար հետ մրցում են, թե ով ավելի խորը մտնի Ռուսաստանի համապատասխան տեղը, դա է նրանց նպատակը՝ ով ավելի շատ կքծնի, ով ավելի շատ կհաճոյանա: Այդ միջավայրում ես նրանց հետ մրցել չեմ կարող: Ցավոք սրտի, երկրորդ նախագահը Հայաստանի միակ առանց բողոքի ընտրված նախագահն է եղել: 98-ին նա ճիշտ սկսեց՝ ի տարբերություն Լևոն Տեր-Պետրոսյանի և Սերժ Սարգսյանի. մեկը Պառավաքարով սկսեց, մյուսը՝ Մարտի 1-ով: Սա ճիշտ սկսեց հետո ենթարկվեց ընդհանուր պարտադրվող մտայնությանը»:
Հայրիկյանն ընդգծեց, որ Քոչարյանն իր համար որակ չի ներկայացնում. ««Գույք՝ պարտքի դիմաց»-ը և Մարտի 1-ը նրան դարձնում են բացարձակապես անընդունելի քաղաքական գործիչ, նա այստեղ իր ներկայությունից պետք է ամաչի: Նա այնպիսի բաներ է արել, որ որևէ պետական գործիչ իրեն թույլ չի տվել անել»:
