Լատվիայում ՀՀ դեսպանությունը (նստավայը՝ Վիլնյուս) Լատվիայի երաժտական ակադեմիայում սեպտեմբերի 21-ին կազմակերպել է համերգ՝ նվիրված Հայաստանի և Լատվիայի հարյուրամյակներին, ինչպես նաև ՀՀ անկախության 27-ամյակին:
Ինչպես տեղեկացնում է ՀՀ արտգործնախարարության մամուլի, տեղեկատվության և հասարակայնության հետ կապի վարչությունը, միջոցառմանը ներկա են եղել Լատվիայի օրենսդիր և գործադիր մարմինների ներկայացուցիչներ, Լատվիայում հավատարմագրված շուրջ մեկ տասնյակ դեսպաններ, դիվանագիտական կորպուսի անդամներ, լատվիացի մտավորականներ և կոմպոզիտորներ, հայ համայնքի ներկայացուցիչներ:
Լատվիայի և Հայաստանի մշակույթի նախարարությունների աջակցությամբ անցկացված միջոցառմանը ողջույնի խոսքով հանդես է եկել Լատվիայի մշակույթի նախարարության գլխավոր քարտուղար Դասե Վիլսոնեն, ով, անդրադառնալով լատվիական մշակութային կյանքում մեծ ներդրում ունեցող հայազգի գործիչներին, գոհունակությամբ նշել է, որ նման միջոցառումների կազմակերպումը ևս մեկ անգամ հաստատում է հայ-լատվիական մշակութային հարաբերությունների բարձր մակարդակը:
Իր ելույթում Լատվիայում ՀՀ դեսպան Տիգրան Մկրտչյանը նշել է, որ հայ-լատվիական մշակութային, գիտակրթական հարաբերությունները վերջին տարիներին էապես զարգացում են ապրել, որի արդյունքում հնարավորություն է ընձեռվել հայոց պատմությունը և հայ մշակույթի հատընտիր գործերը լավագույնս ներկայացնել լատվիական հանրությանը:
Խոսելով հայ-լատվիական քաղաքական հարաբերությունների մասին՝ դեսպանն այդ համատեքստում կարևորել է ՀՀ-ԵՄ նոր համաձայնագրի կյանքի կոչելը, որի առաջին վավերացնողներից էր Լատվիայի օրենսդիր մարմինը, և հույս հայտնեց, որ առաջիկայում հայ-լատվիական քաղաքական հարաբերությունները նոր փուլ կթևակոխեն: Իր խոսքում Տիգրան Մկրտչյանը շոշափել է նաև տնտեսական համագործակցության դրական դինամիկան և երկկողմ առևտրաշրջանառության աճը, կարևորել Ռիգայի հայ առաքելական եկեղեցու դերը հայկական ինքնության պահպանման գործում:
Համերգի ընթացքում հանդիսատեսը հնարավորություն է ունեցել ունկնդրելու ականավոր ժամանակակից հայ և լատվիացի կոմպոզիտորների ստեղծագործություններ երիտասարդ դաշնակահար, ՀՀ ժողովրդական արտիստ Հայկ Մելիքյանի կատարմամբ։ Համերգից հետո տեղի է ունեցել ընդունելություն: