Երեկ Ռուսաստանի խորհրդարանի վերին պալատը՝ Դաշնային խորհուրդը, վավերացրել է ռուսական բազայի՝ մինչև 2044 թ. Հայաստանի տարածքում մնալու արձանագրությունը: Նաև որոշում է կայացվել, որ ռազմաբազան օպտիմալացման է ենթարկվելու, իսկ օպտիմալացման արդյունքում ավելացած ռազմամթերքը անհատույց տրամադրվելու է Հայաստանի զինված ուժերին: Նկատենք, որ նման որոշում կայացվում է Կազանի եռակողմ հանդիպումից երկու օր առաջ:
Ռազմավարական և ազգային հետազոտությունների հայկական կենտրոնի ղեկավար Մանվել Սարգսյանի գնահատմամբ՝ ճիշտ չէ այստեղ անմիջական կապ փնտրել, քանզի ռուսական կողմը դա, միևնույն է, պետք է աներ, սակայն կազանյան հանդիպման հետ կապ, այդուամենայնիվ, կա: Եվ ընդհանրապես, ըստ Սարգսյանի, այժմ ամեն մի գործողություն պտտվում է Կազանի շուրջ:
Սարգսյանի խոսքերով՝ այս հակամարտության կարգավորման բոլոր կողմերն էլ այսօր փորձում են հայտարարություններ, ինչ-որ քայլեր անել, որոնք ուղղված են ազդեցության ոլորտներ ուժեղացնելուն:
«Կազանի պրոցեսում ամեն մի երկիր իր դիրքորոշումն ունի և ցանկություն ունի ստանալ այն արդյունքը, որն իր համար ցանկալի է»,- նկատեց Սարգսյանը և հավելեց, որ Եվրախորհրդարանում ամերիկացի և ֆրանսիացի համանախագահների ելույթներն էլ որոշակի ազդեցություն գործելու մի ձև էին:
ՌԱՀՀԿ ղեկավարը նաև նկատեց, որ ռուսական ռազմաբազաների տեղակայման պայմանագրի երկարաձգման ֆունկցիաներից մեկն էլ Հայաստանին զենք մատակարարելն է, և այս որոշումը նոր չէ:
