«Առաջին լրատվական»-ի տեղեկություններով, Ազգային անվտանգության ծառայությունը հետաքրքրված է Ջիվան Միքայելյանի՝ հանցագործության մասին հաղորդումներով, որոնք վերաբերում են որոշ պաշտոնյաների անգործությանը կամ գործողություններին:
Ջիվան Միքայելյանը հուլիսի 28-ին ԼՂՀ Մարտունու զորամասերից մեկի դիրքերում սպանված 6 զինծառայողներից մեկի՝ Կարո Այվազյանի պապիկն է, ով իր թոռնիկի մահվան մեջ մեղադրում է բոլոր այն պաշտոնյաներին, ովքեր օրենքի խախտմամբ նրան զորակոչել էին բանակ (Կարոն ԱՄՆ-ում 3 անգամ դատապարտված էր եղել), հետո կաշառք ուզել բանակ չտանելու համար, իսկ սպանությունից հետո փորձում են բոլորին համոզել, թե նա է իր զինակիցներին սպանել, հետո՝ ինքնասպան եղել: Ջ.Միքայելյանը պահանջում է նաև պատասխանատվության ենթարկել Արաբկիրի վարչական շրջանի ղեկավարի տեղակալ, նախկինում՝ աշխատակազմի Կոմունալ տնտեսության և բազմաբնակարան շենքերի կառավարման մարմինների հետ աշխատանքի կազմակերպման բաժնի պետ Հրայր Անտոնյանին, նրա ենթակային, որոնց պաշտոնեական գործողությունները երկակի ստանդարտներով են դրսևորվել Ջիվան Միքայելյանի և նրա հարևան, ոստիկանության մայորի իրականացրած շինարարական աշխատանքների կապակցությամբ. եթե վարչական դատարանը որոշի, որ զինվորի պապիկը ապօրինի շինարարություն է իրականացրել, նա պետք է վճարի 2 մլն 700 հազար դրամ, իսկ մայորի «խաթրին» կպնող չի լինի:
Պապիկը թոռնիկի մահվանից 14 օր առաջ դիմել էր Արաբկիրի վարչական շրջանի ղեկավարին՝ տան տանիքը և դրա տակ գտնվող խարխուլ պատը վերանորոգելու կամ փոփոխելու թույլտվություն ստանալու խնդրանքով, որպեսզի տան կաթոցներն ու խոնավությունը վերանան: Տանիքը վերանորոգելու կապակցությամբ թաղապետարանից չեն առարկել, և Ջ.Միքայելյանն սկսել է շինարարությունը: Իսկ թոռնիկի ողբերգական մահվանից հետո արդեն, երբ պապիկը սկսել է զուգահեռաբար աջուձախ բողոքել Կարո Այվազյանի և իր (պապիկին այդ ընթացքում սկսել են անհայտ մարդիկ սպառնալ, որ չբողոքի) ոտնահարվող իրավունքների մասին, հոկտեմբերի 14-ին Ջիվան Միքայելյանի տանն է հայտնվել Հրայր Անտոնյանի ենթակա Սամվել Սիմոնյանը և, ըստ Ջիվան Միքայելյանի, իրենից 10,000 դրամ ուզել, որպեսզի 200,000 դրամի վարչական տույժի չենթարկի: Պապիկը չի տվել, և Սիմոնյանը 200,000-դրամանոց ակտ է կազմել՝ նշելով, թե երկրորդ հարկ է կառուցում: Վարչական ակտը հաստատել է Երևանի քաղաքապետարանը, չնայած պապիկը մինչ այդ դիմել էր Անտոնյանին և վարչական մարմնի ղեկավարին, որպեսզի վերացնեն այդ անհիմն ակտը: Նա նաև տեղեկացրել էր, որ եթե իրեն տուգանում են, ապա ինչու չեն տուգանում անմիջապես իր հարևանությամբ ինքնակամ շինարարություն կատարող, ոստիկանության Արաբկիրի բաժնի աշխատակից, ոստիկանության մայոր Վ.Խաչատրյանին, քանի որ նա խախտելով քաղաքաշինական և ճարտարապետական նորմերը՝ մոտ 75-80 քմ մակերեսով շինություն է կառուցել տրանսֆորմատորային կայանի հարևանությամբ: Հրայր Անտոնյանը Ջիվան Միքայելյանին պատասխանել է, թե նրա հարևանը 90-ականներին է ավտոտնակը կառուցել: Իսկ երբ «Ժամանակ»-ն անդրադարձել էր այս խնդրին՝ Հ.Անտոնյանը սպառնացել էր, որ կպատժի նրան, և որ գրելու մեթոդներն իր վրա չեն ազդում. այս երկիրը օլիգարխների երկիր է, ինքը օլիգարխ է՝ տաքսի ծառայություններ, շատ փող, ազդեցիկ ընկերներ ունի, և որ պապիկի նմանները չեն կարող իր վրա ազդել: Իսկ երբ պապիկը իր զոհված թոռնիկի և որպես զոհվածի ընտանիքի անդամ՝ արտոնությունների մասին էր բարձրաձայնել, Անտոնյանը պատասխանել էր՝ ապաշնորհ պապ ես, փող չես տվել, որ միակ կերակրող թոռդ չգնար Ղարաբաղ ու չզոհվեր: Բաժնի պետը նաև հայտնել էր, որ ինչքան Կարոյի պապիկը պայքարի, այնքան իր համար լավ կլինի՝ իր պաշտոնը կբարձրացնեն: Եվ այդպես էլ եղել էր. երկրորդ արձանագրությունն էին կազմել նույն բաժնի աշխատակիցները՝ նշելով, թե Ջ.Միքայելյանը շարունակել է շինարարությունը, և 2.5 միլիոնանոց վարչական ակտ էին կազմել ու ուղարկել վարչական դատարան: Հաշվի չէին առել Ջ.Միքայելյանի ընտանեկան դրությունը. նրա խնամքին է զոհված թոռնիկի դպրոցական եղբայրը, 94-ամյա մայրը, որդու ընտանիքը: Իսկ Արաբկիրի վարչական շրջանի ղեկավար Էդուարդ Մուշեղյանը՝ Կյաժ Էդոն, Հրայր Անտոնյանին, որպես «պարգևատրում», տարել էր իրեն տեղակալ:
Ջիվան Միքայելյանը երեկ տեղեկացրեց, որ վարչական ակտը վիճարկելու հետ կապված նիստը նշանակված է հուլիսի 20-ին: Իսկ մինչ այդ, նրա իրավունքների պաշտպանությունը ստանձնած ԱԺ «Ժառանգություն» խմբակցության պատգամավոր Զարուհի Փոստանջյանի՝ համապատասխան իրավասու ատյաններ ուղարկված հարցադրումների և հաղորդումների կապակցությամբ, Ջիվան Միքայելյանին հրավիրել էին ԱԱԾ՝ առերեսումներ արել Հրայր Անտոնյանի հետ: Կարոյի պապիկը կասկած ունի, որ Հրայր Անտոնյանը փորձում է բողոքը «շուռ տալ» իր՝ բողոքողի դեմ. ստորագրություններ են հավաքել, որ իբր կողքի հարևան մայորը ավելի վաղ է կատարել կառուցապատումը և օրինականացրել, իսկ ընդհանրապես պապիկի՝ իրեն վերաբերող մնացած հայտարարությունները զրպարտություն են: ԱԱԾ-ին նաև հետաքրքրել է, թե Ջիվան Միքայելյանն ինչո՞ւ է հատկապես Զարուհի Փոստանջյանին դիմել: Նա էլ պատասխանել է, որ պարզապես համակրում և ընդունում է այդ կուսակցության առաջնորդին: Հիշեցնենք, որ Հրայր Անտոնյանը նաև Զարուհի Փոստանջյանի եղբոր՝ վերջերս համաներված Տիգրան Փոստանջյանի վերադասն էր: Տիգրանը կալանավորվել էր ապօրինի վարձատրություն «ստանալու» մեղադրանքով, որն այդպես էլ չապացուցվեց դատարանում: Այդ գործելաոճն իրավապաշտպաններն ու հասարակության մի մասը պայմանավորեց քաղաքական դրդապատճառներով. նպատակը Տիգրանի քրոջ՝ Զարուհի Փոստանջյանի ակտիվ գործունեությունը կասեցնելն էր, որն իրականացնում է մարդու իրավունքների և պետության օրինական շահերի պաշտպանության բնագավառում՝ ինչպես երկրի ներսում, այնպես էլ միջազգային ասպարեզում:
