Գիշերը Լոնդոնի ոստիկանությունը բերվել է պատրաստականության բարձր վիճակի: Նման միջոցառումներ են ձեռնարկվել այն բանից հետո, երբ դատարանն օրինական է ճանաչել ոստիկանության գործողությունները սպանության գործով, որը զանգվածային անկարգություններ էր առաջացրել 2011 թվականի օգոստոսին: Մտավախություն կա, որ արդարացված վճիռը կարող է հուզումների կրկնության պատճառ դառնալ: Այս մասին հայտնում է ITAR-TASS-ը:
2011-ի օգոստոսի 4-ին Լոնդոնի հյուսիսային ծայրամասում՝ Տոտենհեմ շրջանում, ոստիկանության ծառայողների կողմից ձերբակալման փորձի ժամանակ սպանվել էր 29-ամյա Մարկ Դագանը: Օպերատիվ տեղեկություններով՝ երիտասարդը զենք է ունեցել, որը ձեռք էր բերել սև շուկայից: Տաքսին, որով երթևեկում էր Դագանը, կանգնեցվել էր ոստիկանների կողմից: Կասկածյալը փորձել էր փախչել, սակայն նրա ուղղությամբ կրակ էր արձակվել:
Մահացու կրակոցն արձակած ոստիկանության սպան ասել է, թե իրեն թվացել է՝ Դագանը վերցրել է ատրճանակը, սակայն սպանվածի մոտ զենք չի եղել: Ավելի ուշ այն հայտնաբերվել էր սպանվածի մարմնից մի քանի մետր հեռավորության վրա: Ոստիկանության վարկածով՝ Դագանն այն աննկատ նետել է մի կողմ, սակայն որոշ վկաներ հաստատել են, որ ոստիկաններն են ատրճանակը նետել թփերի մեջ այն բանից հետո, երբ կասկածյալը սպանվել է:
Դագանը բնակվել է Տոտենհեմում, որտեղ բնակչության մեծամասնությունը կազմում են ներգաղթյալները:
Լոնդոնի քաղաքապետ Բորիս Ջոնսոնը դիմել է երկրի ներքին գործերի նախարար Թերեզա Մեյին՝ Լոնդոնի ոստիկանությանը ջրցան մեքենաներով ապահովելու խնդրանքով, որոնք կկիրառվեն զանգվածային ելույթները ցրելու համար:
