«Առաջին լրատվական»-ի զրուցակիցն է «Ազատամարտիկների դաշինքի» խորհրդի անդամ Ռազմիկ Պետրոսյանը։
-Պարոն Պետրոսյան, դուք հայտարարություն էիք տարածել, որ սատարում եք գործող վարչապետին ու նոր իշխանությունների գործողություններին։ Այս փուլում ի՞նչ վտանգներ եք տեսնում նոր իշխանության համար։
–Վտանգներ չեմ տեսնում, ընդհանուր վերակենդանացման նշաններ են երևում այն քաղաքական թիմի կողմից, որն այս երկիրը հասցրել է ծայրահեղ վիճակի։ Ոչ թե միայն «Ազատամարտիկների դաշինքը», այլ յուրաքանչյուր գիտակից հայ պետք է կանգնի հեղափոխության կողքին ու հաղթանակը հասցնի տրամաբանական ավարտին, փոխանցի սերունդներին։ Հակառակ դեպքում՝ վերակենդանացումը այս երկրի վերջն է։ Եթե քաղաքական ուժը նորից իշխանության վերադառնալու համար պատրաստ է իր պետությունը ուրիշ երկրներում՝ Ռուսաստանում, ԱՄՆ-ում վարկաբեկելու հաշվին, անվտանգությունը ծայրահեղ վիճակի հասցնելու հաշվին իշխանություն գալ փափագի՝ ապա նրանց ոչ միայն պետք է քաղաքական դաշտից մաքրել, այլ որպես պետական դավաճան կալանավորել։ Այսօր իրենք իրենց գործունեությամբ ևս մեկ անգամ ապացուցում են, որ չարիք են այս երկրի համար։
-Կարծում եք՝ հնարավո՞ր կլինի Մարտի 1-ի բացահայտումը մինչև վերջ հասցնել։
-Այսպիսի ագրեսիվ ակտիվացումը, ցնցումները վկայում են այն մասին, որ իրավապահ մարմինները ճիշտ ճանապարհի վրա են։ Մենք մեր հայտարարության մեջ այդ մասին նշել ենք։
-Հակահեղափոխության վտանգ կա՞։
–Միակ վատությունը, որ կարող է անել «հակահեղափոխություն» կոչվածը, ռևանշիստները՝ ընդամենը այս ընթացքը որոշակի դանդաղեցնելն է, բայց հետդարձ գոյություն չունի։ Ինձ հարցնում են՝ հնարավո՞ր է ՀՀԿ-ն նորից գա իշխանության, ես ասել եմ, եթե ՀՀՇ-ն գաղափարական կուսակցություն էր՝ մտավորականներով համալրված, անգամ այդ քաղաքական ուժը չկարողացավ հետ գալ, ուր մնաց այդ կլանը, որը ձևավորված է մեկը մյուսի վրա կոմպրոմատներով։ Նրանք ընդամենը գոյություն քարշ տալու, իրենց ունեցվածքը պահելու համար միավորվել են, այնպես որ, ոչ թե գաղափարի շուրջ են համալրվել, այլ թալանածը ամրագրելու համար։ Ժողովուրդը ատում է այդ վարկաբեկված ուժերին՝ ի դեմս Շարմազանովի, Աշոտյանի, նրանց ոչ ոք չի ուզում տեսնել։ Նույնիսկ եթե ինչ-որ լավ բան են ուզում արած լինել՝ ժողովուրդը չի վստահում։ Ուզում եմ ժողովրդին կոչ անել, որ չհուսալքվեն, ընդամենը չորս ամսվա իշխանություն է, չորս ամսում 20 տարվա թալանածն ու ավիրածը հնարավոր չի լինի հետ բերել։ Իշխանությունն այսօր ամբողջական չէ, օրենսդիր մարմնում գերակշռում են ՀՀԿ-ականները՝ խմբակցության ղեկավարներով, ԱԺ նախագահով, փոխնախագահներով, որոնք Արևմուտքում վարկաբեկում են Հայաստանը։ Նույնիսկ մինչև արտահերթ ընտրությունները պետք է հանձնաժողովի նախագահները, ղեկավար կազմը փոխվի՝ ժողովրդի ճնշմամբ։
-Քոչարյանն ասում է՝ շնորհավորում եմ, նոր բռնապետ ունենք։
-Դրանով հաստատում է, որ ինքը նախկինում բռնապետ է եղել։
-Նաև նշում է՝ Նիկոլ Փաշինյանը կփոշմանի, որ իր հետ գլուխ է դրել։
-Ամոթ էլ է նրա հետ գլուխ դնել, պատիվ չի բերում։
