Երևանի ընդհանուր իրավասության դատարանի՝ Կենտրոն վարչական շրջանում գտնվող նստավայրում Մնացական Մարտիրոսյանի նախագահությամբ շարունակվեց Արիգ Տ.-ի գործի դատական քննությունը:
Արիգ Տ.-ին մեղադրանք է առաջադրվել խոշոր չափերի գույքի վնասման համար՝ ՀՀ քրեական օրենսգրքի 185 հոդվածի 2-րդ մասի 2-րդ կետով:
Ըստ մեղադրանքի՝ Արիգ Տ.-ն տարածված խոսակցություններից տեղեկացել է, որ «Վիվարո Բեթինգ» ՍՊԸ գրասենյակներում խաղադրույքներ են ընդունվում ՌԴ` Սոչի կատարելիք առաջին այցից առաջ ՀՀ վարչապետ Նիկոլ Փաշինյանի սափրվելու կամ չսափրվելու հարցով: Նման հարցադրումով խաղադրույքներ ընդունելը Արիգ Տ.-ն Հայաստանի Հանրապետության համար անընդունելի և վիրավորական է համարել, զայրացել և վրդովմունքով է լցվել՝ որպես ՀՀ հպարտ քաղաքացի:
Նիկոլ Փաշինյանի՝ Սոչի մեկնելու օրվա՝ 2018 թվականի մայիսի 13-ի գիշերը «Վիվարո Բեթինգի» գույքը վնասելու միասնական դիտավորությամբ Արիգ Տ.-ն, ըստ մեղադրանքի, շրջել է Երևան քաղաքով ու քարեր նետելով՝ ջարդել է «Վիվարոյի» 8 մասնաճյուղերի դռները, ապակիները, վնասել է գույքը՝ պատճառելով խոշոր չափի՝ ընդհանուրը՝ 1 միլիոն 376 հազար 660 դրամի գույքային վնաս:
Արիգ Տ.-ն դատարանում իրեն լիովին մեղավոր է ճանաչել, նա չի վիճարկել առաջադրված մեղադրանքը: Իր շահերը պաշտպանում է ինքնուրույն, պաշտպան չի ներգրավել: Նրա խափանման միջոցը ստորագրությունն է չհեռանալու մասին:
Գործը քննվում է սովորական ընթացակարգով:
Դատարանը հետազոտել է քրեական գործում առկա ապացույցները: Դատական այս նիստին դատարանի դահլիճ բերվեցին գործով իրեղեն ապացույց ճանաչված, առանձին փաթեթավորված քարերի, պլաստմասսայի, ապակու կտորները, ինչպես նաև ջարդված մեկ հեռուստացույց:
«Վիվարո Բեթինգ» ընկերությունը պատճառված գույքային վնասի հատուցման պահանջով քաղհայց է ներկայացրել: Ներկայացված հայցի չափով կալանք է դրել Արիգ Տ.-ի գույքի վրա:
Դատական այս նիստին հարցաքննվեց «Վիվարո Բեթինգ» ՍՊԸ մենեջերներից մեկը՝ Աննա Ա.-ն: Վկան հայտնեց, որ դեպքից հետո միացել էր ընկերության՝ Մաշտոցի պողոտա 37 հասցեում գտնվող մասնաճյուղի անվտանգության ազդանշանը: Իրեն, որպես մենեջերի, անհապաղ կանչել էին մասնաճյուղ, քանի որ առանց իրեն ոչ ոք գրասենյակ մուտք գործելու իրավունք չուներ:
Դիտել են տեսագրող սարքերի տեսագրությունը, պարզել են, որ դրսից քարով հարվածել են մասնաճյուղի ապակեպատ դռանը: Ապակին ճաքեր էր տվել, ապա ջարդվել է. «Ես միայն ջարդված դուռն ու ապակիներն եմ տեսել… Ջարդողը հեռացել էր…»,- ասաց վկան՝ նշելով, որ Արիգ Տ.-ի մասին իմացել է գործի քննության ընթացքում:
Ընկերության կոնկրետ այդ մասնաճյուղին, ըստ կազմակերպության ներկայացրած թվերի, դրսից քարի հարվածների արդյունքում պատճառվել է 144 հազար դրամի գույքային վնաս:
Գործով պետք է հարցաքննվեն ևս երեք վկաներ, ովքեր չեն ներկայանում դատարան: Նրանց վերաբերյալ դատարանը կայացրեց բերման ենթարկելու որոշում:
Վկաների հարցաքննությունը կշարունակվի հաջորդ դատական նիստին:
