«Առաջին լրատվական»- ի հետ զրույցում անդրադառնալով դիտարկմանը, որ Հայաստանը բուռն արտաքին քաղաքական շրջափուլում է՝ վարչապետ Փաշինյանը սեպտեմբերի 8-ին Մոսկվայում հանդիպել է ՌԴ նախագահ Պուտինին, այսօր աշխատանքային այցով Հայաստանում է Վրաստանի վարչապետը և սեպտեմբերի 14-ին նախատեսվում է Մակրոնի հրավերով վարչապետի այցը Ֆրանսիա, ԵՊՀ Եվրոպական ուսումնասիրությունների կենտրոնի ղեկավար Արթուր Ղազինյանը նշեց. «Նախ ասեմ, որ Հայաստանում տեղի ունեցած իշխանության փոփոխության արդյունքում պահանջ առաջացավ վերանայել արտաքին քաղաքական հիմնական գերակա ուղղությունների նկատմամբ կառավարության վերաբերմունքը և դրանով պայմանավորված՝ ամռան 3 ամիսների ընթացքում որոշակի նախապատրաստական աշխատանքներ պետք է տարվեին սեպտեմբերին սպասվող ակտիվ քաղաքական շրջանի բացման համար, ինչը մենք տեսանք. առաջին այցը Ռուսաստան՝ հանդիպում ՌԴ նախագահի հետ, ապա նաև տեղի ունեցավ Վրաստանի վարչապետի այցը Հայաստան, դա, իմ կարծիքով՝ առաջին հերթին քաղաքավարության ռեֆլեքս էր, այդպիսի ձևավորված ավանդույթ կա… Հայ-վրացական հարաբերություններն ունեն կենսական և ռազմավարական բնույթ, և դա պետք է պահպանել»:
Ա. Ղազինյանի դիտարկմամբ՝ Մակրոնի հրավերով վարչապետի այցը Ֆրանսիա և այդ այցից մեկ ամիս հետո Մակրոնի այցը Հայաստան կարևոր են ՀՀ-ԵՄ հարաբերություններում ակտիվություն մտցնելու առումով: «Ֆրանսիան հանդես է գալիս, որպես ԼՂՀ կարգավորման համանախագահող երկիր և հետաքրքրություն ունի Հարավային Կովկասում խաղաղության և կայունության պահպանման գործում»,- նշեց Ղազինյանը:
«Կցանկանայի, որ հայ-ռուսական հարաբերությունները լինեին այնքան անամպ, որքան ներկայացվում է»,- ընդգծեց Ա. Ղազինյանը՝ անդրադառնալով հայ-ռուսական հարաբերությունների վերաբերյալ Ն. Փաշինյանի բարձր գնահատականին: Մեր զրուցակցի դիտարկմամբ՝ այդ գնահատականը մի փոքր քաղաքականացված է: Նրա կարծիքով՝ հայ-ռուսական հարաբերությունների ձևաչափը ենթարկվում է փոփոխության:
Ա. Ղազինյանը մտահոգություն հայտնեց Սիրիային հումանիտար համատեղ օգնություն ցուցաբերելու նախաձեռնության վերաբերյալ: Նրա խոսքով՝ ՀՀ դրոշի ներքո Հայաստանի ԶՈՒ օգտագործումը սիրիական հակամարտության մեջ, Հայաստանի անվտանգության համար կարող է վտանգավոր լիել: «ԶՈՒ ասելով՝ նկատի չունենք միայն զինված ստորաբաժանումներ, տանկեր և այլն, ԶՈՒ մաս են կազմում նաև սակրավորները, զինվորական բժիշկներն ու ինժեներները… Հայաստանի պետական շահը պահանջում է առավելագույն չեզոքություն ցուցաբերել այս բարդ ու խճճված հակամատության մեջ»:
Մանրամասն՝ տեսանյութում: