Առողջապահության համաշխարհային կազմակերպությունը աշխարհում ինքնասպանությունների թվի վերաբերյալ ցնցող վիճակագրություն է տարածել: Հավաքված տվյալների համաձայն՝ մոլորակի վրա ինքնասպանություն է տեղի ունենում ամեն 40 վայրկյանը մեկ, և առավել խոցելի են պատանիներն ու երիտասարդները: 15-29 տարեկանների մահվան երկրորդ ամենատարածված պատճառը ինքնասպանությունն է՝ գրում է fakty.ua-ը:
Առողջապահության մասնագետները վերլուծել են ինքնասպանությունների տարածվածությունը և եկել այն եզրակացության, որ թեև երևույթը գլոբալ է, բայց կան երկրներ, որտեղ ինքնասպանությունների թիվը զգալիորեն մեծ է: Ամեն տարի աշխարհում շուրջ 800 հազար մարդ ինքնասպան է լինում, այդ դեպքերի 79% -ը միջին և ցածր եկամուտ ունեցող երկրներին է բաժին ընկնում:
Եվրոպայում ինքնասպանությունների ամենաբարձր մակարդակը գրանցվել է վեց երկրներում՝ Ռուսաստան, Բելառուս, Ուկրաինա, Լիտվա, Լատվիա, Բելգիա:
Բացի այդ, աշխարհում ինքնասպանությունների բարձր մակարդակ է նկատվում նաև Ղազախստանում, Հնդկաստանում, Ուրուգվայում, Զիմբաբվեում: Ընդհանուր առմամբ, ինքնասպանությունները կազմում են աշխարհի բոլոր մահերի 1.4% -ը:
