«Ազատությունը պետք է վերածել ազատության՝ հանուն ինչ-որ բանի: Մեր հասարակությունը անցումային փուլում է. հեղափոխությունը անցում է մի տիպի հասարակությունից այլ տիպի հասարակության: Իշխանափոխությունն էական է, բայց միակ իրադարձությունը չէ, որի վրա պետք է սևեռվել: Կարևոր է, թե ինչպես է հասարակությունը վերափոխվելու»,- «Առաջին լրատվական»- ի հետ զրույցում այս տեսակետը հայտնեց մշակութային մարդաբան Աղասի Թադևոսյանը՝ հավելելով, որ մեր հասարակությունը պատրաստ էր այս փոփոխությանը:
Նրա դիտարկմամբ՝ այս անգամ մեր հասարակության մեջ ընդվզման այլ մշակույթ էր դրսևորվել, որովհետև սերունդ է փոխվել: «Այլ բան է, թե այս երիտասարդությունը կկարողանա՞ նույն ակտիվությամբ մասնակցություն դրսևորել հետհեղափոխական իրադարձություններին, դա շատ էական է»,- նշեց Ա. Թադևոսյանը:
Նրա կարծիքով՝ Երևանի ավագանու ընտրություններում առաջադրվել են այնպիսի կերպարներ, որոնք նախկին իշխանության ժամանակ անհնարին է, որ մուտք գործեին քաղաքականության մեջ. «Քանի որ նրանք կայացած անհատներ են, իսկ նախկին իշխանությունը չէր հանդուրժում անհատների: Նախկին իշխանությունների ներկայացուցիչները ծառայում էին իրենց մեկ տիրոջը: Տիրոջ ու ծառայի հարաբերության մեջ չէին կարող տեղավորվել ազատատենչ մարդիկ»:
Մանրամասն՝ տեսանյութում:
