Սիրիայի ընդդիմությունը հզոր քարոզչական արշավ է սկսել «Իրաքի և Լևանտի իսլամական պետություն» (ISIS) ահաբեկչական կազմակերպության դեմ, որը կապեր ունի «Ալ-Քաիդա»-ի հետ՝ հաղորդում է իսրայելական MIGNews-ը:
«Մենք՝ «Մոջահեդինների բանակը», միավորվել ենք, որպեսզի պաշտպանենք մեր կյանքը, մեր հողերը, մեր փողերը և կռվենք անարդարության դեմ, որոնց հեղինակը ISIS-ն է»,- ասվում է հաղորդագրության մեջ:
Անցած շաբաթվա վերջից Սիրիայի հյուսիսում մշտական մարտական բախումներ են տեղի ունենում ISIS-ի և սիրիացի ապստամբների միջև: Վերջիններս հիմնականում մտնում են «Իսլամական ճակատ» խմբավորման մեջ: Մարտերը սկսվել են Հալեպ մարզի մի քանի քաղաքներում և տարածվել Իդլիբ, Համա, Ռաքքա մարզերում:
Սիրիացի ապստամբների խոսքերով՝ իրենք սկսել են «երկրորդ հեղափոխություն»: Սիրիական ազատ բանակի մամլո ծառայությունը ISIS-ին մեղադրել է երկրի նախագահ Բաշար Ալ-Ասադի վարչակարգի հետ կապերի մեջ՝ ցուցադրելով սիրիական հետախուզության մի քանի սպաների լուսանկարներ, որոնք մորուք են աճեցրել, անդամակցում են ISIS-ին և հարձակումներ են գործում սիրիացի ընդդիմադիրների դիրքերի վրա:
«Իսլամական ճակատը» վերջնագիր է ներկայացրել ISIS-ին՝ պահանջելով լքել Սիրիայի տարածքը:
Գործակալության փոխանցմամբ՝ ISIS-ը տարհանել է Թուրքիայի հետ սահմանի երկայնքով դիրքերը, տարհանում է իրականացվում նաև Իդլիբում, Դանայում և ռազմավարական կարևոր նշանակություն ունեցող Աթմա քաղաքում:
ISIS-ի դիրքերը զբաղեցնում են «Ջեբհաթ Ալ-Նուսրա» և «Ահրար Ալ-Շամ» խմբավորումների գրոհայինները: Սիրիացի ակտիվիստների խոսքերով՝ ISIS-ի գրոհայինները հեռանում են առանց մարտի, նրանք տանում են իրենց զենքը և, ամենայն հավանականությամբ, շարժվում են Հալեպի ուղղությամբ:
