Վրաստանում ՀՀ արտակարգ և լիազոր դեսպան Հովհաննես Մանուկյանը, ամփոփելով 2013-ին Հայաստանի ձեռքբերումներն ու կորուստները, նշեց, որ քաղաքական իրադարձությունների և խնդիրների լուծման տեսակետից 2013 թվականը Հայաստանի համար թեև բարդ, սակայն հետաքրքիր և արդյունավետ տարի էր:
«Անցնող տարվա կարևոր իրադարձություններից ես, ըստ նշանակության, կառանձնացնեի նախագահական ընտրությունները և Մաքսային միությանը միանալու մասին որոշումը: Այն, որ նախագահական ընտրություններն ավարտվեցին կանխատեսելի արդյունքով և առանց ցնցումների՝ համարում եմ կարևոր քաղաքական համակարգի կայունության տեսակետից: Առավել ևս, դա կարևոր էր արտաքին քաղաքական դաշտում վճռորոշ որոշումների կայացման հեռանկարի համատեքստում»,- ասաց նա:
Ըստ նրա՝ կարևորագույն իրադարձությունը Հայաստանի համար այս տարում թե՛ արտաքին, թե՛ ներքաղաքական հետագա զարգացումների տեսանկյունից երկրի քաղաքական ղեկավարության որոշումն էր Մաքսային միությանն անդամակցելու վերաբերյալ: «Միանալով մեծ սպառողական շուկայի և բնական ռեսուրսներով հարուստ երկրների տնտեսական դաշինքին` Հայաստանը վճռորոշ քայլ կատարեց, ինչը կկանխորոշի առաջիկայում մեր անվտանգության աստիճանը, տնտեսության զարգացման ուղիները և ժողովրդի բարեկեցության մակարդակը: Իհարկե, տնտեսական այդ դաշինքից ակնկալվող բոլոր հնարավոր օգուտները քաղելու համար դեռ սպասվում է ամենօրյա տքնաջան աշխատանք, սակայն դա արդեն, ինչպես ասում են, քաղաքական վարպետության հարց է»,- նշեց Հովհաննես Մանուկյանը:
Ինչ վերաբերում է կորուստներին, ապա, նրա խոսքով, թերևս ոչ թե կորուստ, այլ միգուցե բաց թողնված հնարավորություն կարելի է համարել ղարաբաղյան կարգավորման շուրջ բանակցային գործընթացի պասիվ ընթացքը, ինչի հիմնական պատճառը բանակցային մյուս կողմի ոչ կառուցողական դիրքորոշումն է:
Այնուամենայնիվ, նրա դիտարկմամբ, վերջին իրադարձությունը՝ նոյեմբերի 19-ին Վիեննայում կայացած Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպումը, նոր սպասելիքների հիմք տվեց: «ԵԱՀԿ Մինսկի խմբի շրջանակներում կայացած այդ հանդիպումը մեր կողմից գնահատվեց որպես նոր բանակցային փուլի սկիզբ, և դրական գնահատականների արժանացավ ինչպես բոլոր շահագրգիռ կողմերի, այնպես էլ Մինսկի խմբի գործընթացին չմասնակցող երկրների կողմից, օրինակ՝ Մեծ Բրիտանիայի»,- հավելեց դեսպանը:
Ի՞նչ է տվել դեսպանին 2013-ը հարցադրմանը պատասխանեց, որ իր համար 2013 թվականը միաժամանակ բարդ և հաջող տարի էր, որովհետև պրոֆեսիոնալ տեսակետից հաջողությունն իր համար հենց ամենօրյա քրտնաջան, մանրակրկիտ, հետաքրքիր և մեր երկրի համար օգտակար աշխատանքն է: Իսկ հայ-վրացական հարաբերությունների երկկողմ օրակարգը առատ է այդպիսի աշխատանք պահանջող հարցերով:
«Նոր տարին միայն դրական ակնկալիքներով եմ դիմավորելու՝ գիտակցելով հանդերձ, որ կյանքը բարդ է և միայն բարուց չի բաղկացած: Սակայն հույս ունեմ, որ աշխատանքի առումով բավարարվածության համար 2014 թվականին ևս շատ առիթներ կունենամ: Ամանորյա գավաթ բարձրացնելիս ես, իհարկե, բոլորին կցանկանամ առողջություն, բարեկեցություն և սեր: Լինենք բարի միմյանց նկատմամբ, ունակ լինենք ներել դիմացինի սխալները, փորձենք օգնել մտերիմ և հարազատ, նույնիսկ օտար մարդկանց, որոնք այդ պահին աջակցության և կարեկցանքի կարիք ունեն, քանզի միայն այդ ճանապարհով մարդը կարող է հասնել հոգեկան բավարարվածության և դրանով իսկ օգնել ինքն իրեն: Այս ամենը մաղթում եմ նաև Ձեր ողջ խմբագրակազմին, ընթերցողներին և համայն հայությանը»,- մաղթեց դեսպանը:
