Այսօր Ազգային Ժողովում հավատարմագրված լրագրողների համար ամանորյա ընդունելություն է կազմակերպում ԱԺ նախագահ Հովիկ Աբրահամյանը: Ընդունելությունը կազմակերպվում է այն Ազգային ժողովում, որտեղ նույն այդ լրագրողներին սպառնում են «ծնոտ կոտրել», «կազյոլ» են անվանում, «արա»-ով են խոսում, «սի…տիր» են անում շմայսները, Հովիկ Աբրահամյանը «հաստավիզ» է ասում:
Եվ ուրեմն, ահա այդ Հովիկ Աբրահամյանը լրագրողների համար ամանորյա ընդունելություն է կազմակերպում, այն դեպքում, երբ նույն լրագրողներին երկու օր առաջ ուղղակի ամենավերջին հայհոյանքներով էին դիմավորում և լկտի պահվածքով նրանց աշխատաքներին խոչընդոտում էին տնտեսագիտական համալսարանում, որի կառավարման խորհրդի նախագահն է նույն Հովիկ Աբրահամյանը:
Եվ այսօր Աբրահամյանն ամանորյա ընդունելություն է կազմակերպում լրագրողների համար: Եվ այս ընդունելության ընթացքում նա անպայման գեղեցիկ խոսքեր կասի մամուլի, մամուլի աշխատանքի, ազատ խոսքի և այլնի մասին:
Հայաստանի իշխանությունները կենացների վարպետ են, բա ինչպիսի՜ կենացներ են ասում նրանք հայրենիքը սիրելու մասին: Թե հետո ինչ են անում հայրենիքի հետ՝ բոլորս գիտենք, տեսնում ենք, մեր մաշկի վրա զգում: Բայց կենացներ խմում են: Այսօր էլ կենացներ կխմվեն, պաթետիկ ճառ կարտասանվի, իսկ վաղը նորից կշարունակեն լրագրողների հետ խորհրդարանում վարվել այնպես կամ մոտավորապես այնպես, ինչպես հայրենիքի մասին կենացներից հետո հայրենիքի հետ են վարվում:
Երկդիմի, կեղծ վարքը Հայաստանի իշխանությունների հավատամքն է, մեր բարձրաստիճան պաշտոնյաների կենսակերպը, և այս ամենն այլևս ո՛չ զարմանք, ո՛չ նողկանք չի առաջացնում: Դժվար է ասել, թե ինչ է առաջանում այս ամենի արդյունքում:
Սակայն, ցավոք սրտի, այս ամենի արդյունքում չի առաջանում նաև լրագրողական համերաշխություն և լրագրողները այն ամենից հետո, ինչ իրենց թույլ են տվել պատգամավորները իրենց գործընկերների հասցեին, դեռ կգնան ամանորյա ընդունելությանն ու բաժակ կխփեն Հովիկ Աբրահամյանի հետ՝ նրան և նրա կուսակից մեծամասնությանը Նոր տարում լրագրողների հանդեպ էլ ավելի ամբարտավանության իրավունք տալով:
