Կանխատեսելի էր, որ Մարտի 1-ի գործի նոր շրջափուլը կապված է լինելու արյունոտ իրադարձություններին քրեաօլիգարխիայի ներկայացուցիչների մասնակցության հետ։ Փաստահավաք խմբի զեկույցներում նշված են ինը օլիգարխների կամ պաշտոնյաների անուններ, որոնց թիկնազորի կամ բանդաների անդամները մասնակցություն են ունեցել 2008թ.-ի մարտի 1-ի իրադարձություններին։ Փաստահավաք խմբի զեկույցի այդ դրվագը օրերս հաստատեց պաշտպանության նախկին փոխնախարար Գագիկ Մելքոնյանը՝ նկատելով, որ օլիգարխիայի բանդաները ՊՆ-ից հանդերձանք են ստացել՝ չբացառելով, որ կարող էին նաև հրաձգային զենք ստացած լինել։ Այդ ամենը փաստաթղթավորված է, ու եթե ՀՔԾ-ին հաջողվել է ՊՆ-ից ստանալ հույժ գաղտնի 0038 հրամանը, ապա, բնականաբար, նախաքննության մարմինը տիրապետում է նաև մյուս գաղտնի փաստաթղթերին։ Ամեն դեպքում պետք է սպասել, թե քննությունն ինչ կպարզի։ Սակայն երեկվա բացահայտումները վերաբերում են ոչ միայն անցյալին, այսինքն՝ Մարտի 1-ի գործի բացահայտմանը, այլ թերևս՝ նաև ապագային։
Զենքը կրակելու հատկություն ունի, եթե նույնիսկ պահվում է շատ խորը տեղում։ Շատ կարևոր խնդիր է պարզել, թե ո՞ւմ դեմ էր օգտագործվելու Հովիկ Աբրահամյանի թաքցրած զինապահեստը։ Այն նախկին վարչապետի անվտանգության երաշխի՞քն էր նախկին համակարգի գոյության օրերին, որի միջոցով նա պաշտպանում էր իր բիզնես-կայսրությունը, թե՞ Հովիկ Աբրահամյանը և քրեաօլիգարխիայի մյուս կարկառունները զինապահեստներ էին պահում «սև օրվա» համար, երբ, ասենք, Հայաստանում կվտանգվի իրենց իշխանությունը։
Թեմայի շուրջ օրվա քննարկմանը մասնակցեցին ՀՀ Մարդու իրավունքների առաջին պաշտպան Լարիսա Ալավերդյանը, «Ժառանգություն» կուսակցության քաղաքական խորհրդի նախագահ Արմեն Մարտիրոսյանը և քաղաքագետ Ստեփան Գրիգորյանը:
«Ռոբերտ Քոչարյանի խափանման միջոցը չպետք է փոխվի. պատճառները շատ են: Քոչարյանի պաշտոնավարման տարիներին մենք ի՞նչ ենք տեսել. Հոկտեմբերի 27, Մարտի 1, քաղաքական գործիչների նկատմամբ տեռոր, մարդկանց իրենց տներից էին զրկում… Քոչարյանին ազատ արձակելը սխալ կլինի, հուսով եմ, որ դատարանը սկզբունքային կլինի»,- ընդգծեց Ս. Գրիգորյանը:
«Եթե մենք նպատակ ենք դրել բացահայտել այդ խարանը, որ կարծես թե մեր բոլորիս և մեր պետության ճակատին է դրվել, պետք է գործենք վերին աստիճանի կոռեկտ, անաչառությունը խիզախություն է»,- նշեց Լ. Ալավերդյանը՝ հավելելով, որ իրավապահների կողմից ոչ կոռեկտ քայլեր է նկատում. նրա կարծիքով՝ ՀՔԾ պետի հայտարարությունը ճնշում է դատարանի վրա:
Ա. Մարտիրոսյանի դիտարկմամբ՝ եթե դատարանը չփոխի Ռ. Քոչարյանի խափանման միջոցը, դա մարդու իրավունքի խախտում չի լինի: Նա նաև ընդգծեց, որ պաշտոնավարման ընթացքում Ռ. Քոչարյանը բազմաթիվ բացթողումներ է ունեցել, այդ թվում նաև իրականացրել է բռնաճնշումներ քաղաքական գործիչների նկատմամբ:
Ս. Գրիգորյանի դիտարկմամբ՝ քաղաքական դաշտը մաքրվում է. «Մարտի 1-ի բացահայտումը ամբողջ կեղտը կմաքրի: Ռ. Քոչարյանը նպաստում է լյուստրացիային: Այսօր չար ուժերը և չարիքի շուրջ հավաքված մարդիկ օգնում են լյուստրացիային, մյուս կողմից՝ նորմալ մարդիկ ուզում են նորմալ երկրում ապրել: Մեր ժողովուրդը կապացուցի, որ փողը գլխավորը չէ»:
Մանրամասն տեսանյութում:
