ՀՀ երկրորդ նախագահ Ռոբերտ Քոչարյանի խափանման միջոցը փոխելու վերաբերյալ Ազգային ժողովի պատգամավորների միջնորդությունն այսօր Գլխավոր դատախազությունը մերժել է: Թեմայի շուրջ «Առաջին լրատվական»- ի հետ քննարկմանը մասնակցեցին Գերագույն խորհրդի նախկին պատգամավոր Ազատ Արշակյանը, «Հայ կառուցողական կուսակցության» նախագահ Անդրիաս Ղուկասյանը և պատմաբան Վահրամ Թոքմաջյանը:
«Պատմական օրեր ենք ապրում»,- ընդգծեց Վ. Թոքմաջյանը: Նրա խոսքով՝ աննախադեպ է, որ հետխորհրդային տարածքում նախկին նախագահին կալանավորում են: «Հեղափոխությունը չի ավարտվել, շարունակվում է: Ղարաբաղյան կլանի էպոխան ավարտվեց՝ փոխարինվելով նոր իշխանությամբ: Հեղափոխական հասարակությունը երազում էր այս մասին և այսօր հասել է մի հանգրվանի հետագա նոր գործունեության համար»,- նշեց պատմաբանը:
«Հեղափոխությունը պետք է վերածվի ազգային ազատագրական շարժման,- հավելեց Ա.Արշակյանը: – Նախկին իշխանությունը միայն ավազակների իշխանություն չէր և նպատակը միայն երկիրը թալանելը չէր. 97թ-ից գաղափարախոսություն կար, և այդ գաղափարախոսությունը նախկին «դրախտը»՝ ԽՍՀՄ-ը վերականգնելն էր: Հայաստանը Ռուսաստանի կողմից այսօր էլ դիտվում է որպես ոչ լիարժեք պետություն. բոլոր գաղութարարները ուզում են, որ իրենց վասալ պետություններում անազատություն և կոռուպցիա լինի, որից մենք պետք է ձերբազատվենք»:
ԱԱԾ-ն մարտի 1-ի գործով կատարված խուզարկությամբ հայտնաբերել է մեծ քանակությամբ ռազմամթերք: Ապօրինի կերպով հրազեն և ռազմամթերք ձեռք բերելու և պահելու կասկածանքով ձերբակալվել են Ամբիկ Գևորգյանն ու Հովիկ Աբրահամյանի եղբայրը` Հենրիկ Աբրահամյանը:
Ազատ Արշակյանն անդրադառնալով այս բացահայտմանը՝ նշեց. «Մենք տեղյակ ենք, որ քրեաօլիգարխիկ համակարգը մինչև ատամները զինված է: Շատ հնարավոր է, որ հայտնաբերված այս զենքերը կրակել են և հետո դրանք պահել են: Կարծում եմ՝ կարևոր փուլ մտանք: Մենք գիտենք՝ Հ. Աբրահամյանն ով էր, ով դարձավ»: Վ. Թոքմաջյանը հավելեց՝ սա պետություն է պետության մեջ՝ ի դեմս գաղտնի վարչակարգի:
«Ոտքից գլուխ նախորդ իշխանությունները ապօրինի զինված են եղել և դրա հաշվին են ծնկի բերել մերժողովրդին: Այս բացահայտումները ևս մեկ անգամ ընդգծում են, որ իշխանությունը յուրացրած ավազակային խմբերը կազմակերպված հանցավոր համագործակցության անդամներ են, որոնք զենքի ուժով էին իշխանությունը պահում, և պետությունը ընդամենը ֆասադ էր»,- նշեց Ա.Ղուկասյանը:
Ա.Արշակյանի դիտարկմամբ՝ Մարտի 1-ի զոհերը ոստիկանության զենքից չեն զոհվել, հենց այսպիսի զենքերն են կրակել:
Մանրամասն՝ տեսանյությում:
