Մարտի 1-ի գործով վերջերս երկու նոր զարգացում տեղի ունեցավ՝ կալանավորվեց ՀՀ երկրորդ նախագահ Ռոբերտ Քոչարյանը և մեղադրանք առաջադրվեց ՀՀ նախագահի աշխատակազմի նախկին ղեկավար Արմեն Գևորգյանին:
Այս առնչությամբ «Առաջին լրատվական»-ը զրուցեց Մարտի 1-ի զոհերից Գոռ Քլոյանի հոր՝ Սարգիս Քլոյանի և ՀԱԿ իրավական հանձնաժողովի ներկայացուցիչ Արմեն Խաչատրյանի հետ:
Գոռ Քլոյանի հայրը՝ Սարգիս Քլոյանը, որը նաև մասնակցել է 2008թ. մարտի 1-ի ցույցերին, նշեց, որ այդ ժամանակ զոհեր չէին լինի, եթե հանրապետության նախագահը կամք ունենար և հրամայեր չկրակել ժողովրդի վրա՝ ինչպես 1996-ին վարվեց Լևոն Տեր-Պետրոսյանը. «1996-ին երբ մտան Ազգային ժողով և ջարդեցին ԱԺ նախագահի, փոխնախագահի գլուխները, Լևոն Տեր-Պետրոսյանը հրամայեց չկրակել ժողովրդի վրա: Ի՞նչն էր խանգարում Ռոբերտ Քոչարյանին հրամայել, որ չկրակեն ժողովրդի վրա. հիմա նա քաղում է իր մեղքը»:
Սարգիս Քլոյանի խոսքով՝ ոչ միայն Ռոբերտ Քոչարյանը, այլև դեռ շատ մարդիկ կհայտնվեն ճաղերի ետևում. «Եվ պարտավոր են հայտնվել»:
Անդրադառնալով Ռոբերտ Քոչարյանի փաստաբանների ներկայացրած փաստարկներին՝ Արմեն Խաչատրյանը նկատեց. «Ի՞նչ են ուզում նրանք ապացուցել՝ Ռոբերտ Քոչարյանը անմեղ արարա՞ծ է, և հանկարծ ինչ-որ չար ՀՔԾ որոշեց Ռոբերտ Քոչարյանին բանտարկե՞լ: Այս ժողովուրդը 20 տարի շարունակ՝ ամեն օր տվել է այդ մարդու գնահատականը: Հասարակական գիտակցության մեջ Ռոբերտ Քոչարյան չարիքը այսօր իրավական ձևակերպում է ստանում: Դա այդ չարիքի գործունեության մեկ դրվագն է ընդամենը»:
Արմեն Խաչատրյանի կարծիքով՝ Մարտի 1-ը 2004 թվականին չանցկացված անվստահության հանրաքվեի հետևանքն էր, երբ առաջին անգամ Ռոբերտ Քոչարյանը ապրիլի 12-ին ուժի կիրառմամբ խաղաղ ցույց ցրեց. «Դրանից հետո դա դարձավ նրա համար գործունեության սկզբունք, և մի օր նա կրակեց նաև այդ նույն ժողովրդի վրա»:
ՀԱԿ անդամը վստահ է, որ քննությունն ընթանում է օբյեկտիվ և բազմակողմանի. «Վստահ եմ, որ շատ-շատ հարցերի պատասխաններ կստանանք, պարզապես դա մեր հասարակության համար կլինի շոկերի շարք»:
Մանրամասները՝ տեսանյութում:
