«Առաջին լրատվական»-ի տեղեկություններով՝ օրերս 10 տարվա անազատության դատապարտված Արկադի Վարդանյանը և 14 տարվա անազատության դատապարտված էպոսագետ Վարդան Սեդրակյանը ԱԱԾ մեկուսարանում՝ «Երևան-Կենտրոն» քրեակատարողական հիմնարկում, նույն խցում են:
Մեզ պատմեցին, որ գրեթե ամեն օր խցում թեժ բանավեճ է ծավալվում տեղի ունեցած իրադարձությունների և առհասարակ քաղաքական վերջին զարգացումների թեմայով: Էպոսագետի և Արկադի Վարդանյանի քաղաքական հայացքները, ինչպես հայտնի է, շատ տարբեր են, ինչն էլ ապահովում է թեժ բանավեճը:
Հիշեցնենք, որ Արկադի Վարդանյանին դատարանը 10 տարվա ազատազրկման դատապարտեց Արսեն Ավետյանի հոր սպանությունը նախապատրաստելու և օժանդակելու համար: Իսկ էպոսագետը, ինչպես հայտնի է, դատապարտվեց նախընտրական շրջանում նախագահի թեկնածու Պարույր Հայրիկյանի դեմ մահափորձ կազմակերպելու համար: Թեև դատարանում, փաստաբանի խոսքով, այդպես էլ հիմնավոր ձևով չապացուցվեց նրա մեղավորությունը, այնուամենայնիվ Վերաքննիչ դատարանը ևս անփոփոխ թողեց էպոսագետի դատավճիռը:
Ի դեպ, «Առաջին լրատվական»-ի տեղեկություններով՝ չի բացառվում, որ առաջիկայում հետաքրքիր մանրամասներ ի հայտ գան՝ կապված Հայրիկյանի մահափորձի և դրանում էպոսագետի մասնակցության հարցի շուրջ:
