«Մեր օրենքները սահմանում են, որ դատավարությունը պետք է ավարտվի, գտնվեն և դատապարտվեն մեղավորները և դրանից հետո միայն նրանց կողմից տրամադրվի փոխհատուցում, այսինքն մինչև քրեական դատավարությունը չավարտվի՝ փոխհատուցում տրամադրելու հնարավորություն չկա»,- «Առաջին լրատվական»-ի հետ զրույցում նշեց միջազգային իրավունքի փորձագետ Արա Ղազարյանը՝ խոսելով Մարտի 1-ի զոհերի իրավահաջորդներին փոխհատուցում տալու մասին։
Արա Ղազարյանի խոսքերով՝ դեռևս 1999թ-ի Հայաստանը ստորագրել է, բայց չի վավերացրել հանցագործությունից տուժած անձանց փոխհատուցում տրամադրելու վերաբերյալ միջազգային կոնվենցիան։ Այս կոնվենցիան չվավերացնելու պատճառը բանախոսի դիտարկմամբ՝ Մարտի 1-ի դեպքերն էին։
«Այդ կոնվենցիան սահմանում է, որ, եթե պետական մարմիններն իրենց հանրային մանդատով հանդերձ չեն կարողանում բացահայտել և պատասխանատվության ենթարկել մեղավորներին, ապա տուժողը, ամեն դեպքում, պետք է ստանա փոխհատուցում, այսինքն պետությունը պետք է փոխհատուցում տրամադրի, եթե կա հանցագործություն և կա տուժող կամ տուժողներ։ Քանի որ այս կոնվենցիան մենք չենք վավերացրել, ապա Մարտի 1-ի զոհերի իրավահաջորդներն այդպես էլ առ այսօր փոխհատուցում չեն ստացել և այստեղ գործի լուծման հույսը մնում էր միայն Մարդու իրավունքների եվրոպական դատարանը, որն էլ որքան ես տեղյակ եմ պատրաստ էր վճիռ կայացնելու, սակայն ինչ-ինչ պատճառներով վճիռ չի կայացնում։
Ընդհանուր առմամբ՝ կարող եմ ասել, որ փոխհատուցման իրավական մեխանիզմ չկա այնքան ժամանակ, քանի դեռ քրեական գործի լուծումը չլինի և մինչև վերջերս Հայաստանում Մարտի 1-ի գործը լուծում չէր ստանում, բայց քանի որ հիմա նոր հանգամանքներ են ի հայտ եկել և հնարավոր է, որ այն Հայաստանում լուծում ստանա, որը, սակայն, կարող է տևել 1-2 տարի և սրանից հետո նոր միայն Մարտի 1-ի զոհերի հարազատները փոխհատուցում ստանան»,-պարզաբանեց Արա Ղազարյանը։
Վերջինս զրույցի ընթացքում մանրամասնեց նաև , թե ինչ չափի փոխհատուցում կարող է տրվել և ում կողմից։
Մանրամասները՝ տեսանյութում։