Առաջիկա արտահերթ խորհրդարանական ընտրություններից հետո Ազգային ժողովի պատգամավորների 33%-ը կլինեն կանայք: Հուլիսի 27-ին Ազգային ժողովում տեղի ունեցած ընտրական օրենսդրության բարեփոխումների նպատակով աշխատանքային խմբի հերթական նիստի ընթացքում այսպիսի որոշում կայացրեցին խորհրդարանական ուժերը: «Ելք»-ի ներկայացուցիչ Լենա Նազարյանի խոսքով` այսպես պետք է խթանել քաղաքական գործընթացներին կանանց մասնակցությունը:
«Առհասարակ, կանանց համար դժվար է մասնակցել բոլոր պրոցեսներին, որովհետև այդ ամբողջ գործընթացը ենթադրում է ռեսուրս, էներգիա, ժամանակ, հանրային աջակցություն։ Այս հանգամանքները հաշվի առնելով, կարծում եմ, բոլոր կուսակցություններում էլ կանայք քիչ են ու կուսակցությունները պետք է բավարար ջանք գործադրեն կանանց ներգրավվելու համար։ Այդ գործընթացին խթան կհանդիսանա նաև փակ ցուցակներով համամասնական ընտրակարգը, որովհետև կանայք ինչ-որ առումով երաշխիքներ կունենան ընտրություններում հաջողության հասնելու»,- նշեց Նազարյանը:
«Ծառուկյան դաշինքի» ներկայացուցիչ Նաիրա Զոհրաբյանն ավելի շատ անհանգստացած է ոչ թե խորհրդարանում կանանց քանակի, այլ` որակի խնդրով:
«Ես` որպես կին քաղաքական գործիչ, կողմ եմ կանանց քվոտավորման թվի բարձրացմանը, բայց պատրա՞ստ են քաղաքական կուսակցությունները իրենց ցուցակներում ներգրավել այնպիսի կանանց, ովքեր ունակ են աշխատել խորհրդարանում: Պետք չէ, որ միայն քանակ ապահովելու համար ցուցակներում հայտնվեն այնպիսի կանայք, ովքեր տանջվելու են խորհրդարանում»,- ասաց Զոհրաբյանը:
Խորհրդարանական ուժերի քվեարկության արդյունքում որոշվեց կառավարություն ուղարկվելիք առաջարկների փաթեթում ներառել այն կետը, որ արտահերթ ընտրություններից հետո ԱԺ-ում յուրաքանչյուր 3 պատգամավորից մեկը պետք է լինի իգական սեռի ներկայացուցիչ:
Նիստի ընթացքում քննարկվող հաջորդ առաջարկը ստացվել էր արտախորհրդարանական ուժերի կողմից: «Ծառուկյան» դաշինքի ներկայացուցիչ Սերգեյ Բագրատյանի խոսքով` «Ժառանգություն» և «Ազատ դեմոկրատներ» կուսակցություններն առաջարկում են խորհրդարանական ընտրություններին մասնակցելու համար նախատեսված պարտադիր գումարը նվազեցնել` 10 միլիոնից հասցնելով 5-ի:
«Այստեղ կարևորը գաղափարն է, ոչ թե գումարի չափը: Եթե կուսակցությունը ասելիք ունի, նրան չպետք է դրույքաչափը խանգարի»,- նշեց Բագրատյանը:
ՀՅԴ ներկայացուցիչ Սպարտակ Սեյրանյանի խոսքով` գումարի իջեցումը պետք է լինի ողջամիտ սահմաններում, որպեսզի դրանից ոչ թե օգտվեն պատեհապաշտները, այլ այն չխանգարի փոքր կուսակցություններին` միայն բարձր գումարի չափի պատճառով չմասնակցել ընտրություններին:
ՀՀԿ ներկայացուցիչ Դավիթ Հարությունյանը նշեց, որ այդ գումարի մի մասը տրվում եմ ԿԸՀ-ին` ընտրությունների անցկացումն ապահովելու համար:
«Քանի որ գումար է տրվում նաև ԿԸՀ-ին, որպեսզի իրենց վատ վիճակի մեջ չդնենք, առաջարկում եմ զուգահեռ բարձրացնել նրանց տրվող գումարը։ Դրույքաչափը իջեցնենք 7.5 միլիոնի, իսկ ԿԸՀ-ին տրամադրվող գումարի չափը դարձնենք 40%»,- ասաց Հարությունյանը:
Խորհրդարանական ուժերը կողմ արտահայտվեցին նաև նախորդ նիստում Խոսրով Հարությունյանի ներկայացրած այն առաջարկին, որ ընտրություններից առաջ կուսակցություններն ու դաշինքները ցանկության դեպքում կարող են ներկայացնել իրենց ստվերային կառավարության կազմը: 4 ուժերի կողմից հաստատված այս բոլոր առաջարկները երեքշաբթի օրը կուղարկվեն կառավարություն, և, եթե մինչև երկուշաբթի երեկոյան ընտրական օրենսդրության բարեփոխումների նպատակով ստեղծված խմբի կողմից նոր առաջարկություններ չլինեն:
