Այսօր նախատեսված է դատավորների ընդհանուր ժողովի արտահերթ նիստ։ Նիստը նախաձեռնել են մի շարք դատավորներ, որոնք ավելի վաղ ստորագրահավաք էին սկսել, քանի որ արտահերթ նիստ հրավիրելու համար հարկավոր է 55 ստորագրություն։ Ստորագրությունները հավաքվել են, և թերևս նիստը կկայանա, իսկ օրակարգում քննարկվող հարցը վերաբերելու է դատավորների առաջխաղացման ցուցակների մրցույթներին:
Դատավորները դժգոհ են, որ Բարձրագույն դատական խորհուրդը՝ ի դեմս նախագահ Գագիկ Հարությունյանի, դատավորների թափուր տեղերի մրցույթներում հաղթող է ճանաչում դատավորների, որոնք տարբեր թելերով կապված են այս կամ այն անձի հետ, բայց դա երբեք աչքի չի ընկել իրենց մասնագիտական, աշխատանքային գործունեությամբ։ Իսկ փորձառու դատավորներն այդպես էլ դուրս են մնում ցուցակներից։
Ուշագրավ է, որ այս օրերին մամուլում տեղեկություններ տարածվեցին, որ Բարձրագույն դատական խորհրդի նախագահ Գագիկ Հարությունյանը, որը առժամանակ կասեցրել է առաջխաղացման մրցույթները, զանգահարում է դատարանների նախագահներին, որպեսզի վերջիններս հորդորեն դատավորներին՝ չմիանալ կամ հետ կանգնել արտահերթ նիստ հրավիրելու նախաձեռնությունից: Գագիկ Հարությունյանի ջանքերը, կարծես թե, արդյունք չտվեցին։
Փաստաբան Երվանդ Վարոսյանի խոսքով՝ ինքնին այն հանգամանքը, որ դատավորները նման պահանջ են բարձրացրել և արտահերթ նիստ հրավիրել, արդեն ողջունելի է և տանում է դեպի առաջընթաց։ «Եթե Հայաստանում պետք է դատավորները համակերպվեն անարդարության հետ, էլ ումից ինչ սպասել։ Էլ սպասելու բան չի լինի։ Կարծում եմ՝ առաջինը դատավորներն են հասկանում, որ դատական համակարգը պետք է ձևավորվի առաջին հերթին ճիշտ կազմավորված դատական խորհրդի միջոցով։ Այս Բարձրագույն դատական խորհուրդը՝ թե՛ իր կազմով, թե՛ իր ձևավորման սկզբունքներով ու մեթոդներով ոչինչ անել չի կարող։ Դա մեռելածին կառույց է»,- «Ժամանակ»-ի հետ զրույցում ասաց Վարոսյանը։
Մեր դիտարկմանը, թե այդ մեռելածին կառույցը ամեն դեպքում ունի լիազորությունների կոնկրետ ժամկետ, և այդ ֆոնին ինչի հնարավոր կլինի հասնել, փաստաբանը նկատեց. «Սերժ Սարգսյանը նույնպես վարչապետ էր ընտրվել որոշակի ժամկետով ու լիազորություններով, բայց տեսանք՝ ինչ եղավ։ ՀՀ ցանկացած քաղաքացի պետք է շահագրգիռ լինի, որ բաց, թափանցիկ և բոլորի համար հասկանալի սկզբունքներով ձևավորվի Բարձրագույն դատական խորհուրդը, և այդ խորհրդում ներկայացված լինեն անձինք, որոնք իրենց կենսագրությամբ ապացուցել և ցույց են տվել, թե ինչ դիրքորոշում ունեն, ինչ նպատակ ունեն և ինչ տեսլական ունեն»։
