Տարածաշրջանում՝ առաջին հերթին Հայաստանում ու շղթայաբար նաև ողջ Հարավային Կովկասում որևէ ռազմական էսկալացիա Ռուսաստանին է դնելու բավականին բարդ խնդիրների առաջ:
Ռուսաստանի կովկասյան ներկայության կայունությունը ուղիղ առնչվում է և կախված է Հայաստանի ու տարածաշրջանի անվտանգությունից և կայունությունից, մասնավորապես ղարաբաղյան գոտում: Զգացե՞լ է Նիկոլ Փաշինյանը որևէ վտանգ այդ պատասխանատվությունն ու խնդիրը շեշտադրելու տեսանկյունից: Հատկանշական է նրա շեշտադրումը ռուսական ռազմակայանի միջադեպից հետո. Փանիկի միջադեպը նա գնահատում է որպես սադրանք:
«Բոլորս էլ հասկանում ենք, որ ՌԴ-ն որպես գերտերություն, ունի հնարավորություն թույլ չտալու պատերազմի վերսկսումը մեր տարածաշրջանում։ Եվ ես չեմ կարող հավատալ, որ Հայաստանի ռազմավարական գործընկեր և բարեկամ Ռուսաստանն իր լծակները չի օգտագործի տարածաշրջանում ռազմական գործողությունների վերսկումը թույլ չտալու համար»,- այսօր մամուլի ասուլիսում ընդգծել է Ն. Փաշինյանը:
Թեմայի շուրջ «Առաջին լրատվական»- ի հետ զրույցում անդրադառնալով այս դիտարկմանը՝ միջազգային հարցերով ռուսաստանյան խորհրդի փորձագետ Նիկիտա Մենդկովիչն ընդգծեց. «Իմ կարծիքով Ռուսաստանն, անշուշտ, անում է ամեն հնարավորը, որպեսզի տարածաշրջանում ԼՂ կոնֆլիկտը նորից ակտիվ փուլ չմտնի: Այլ հարց է, որ Ադրբեջանը և Հայաստանը ինքնիշխան պետություններ են, և Մոսկվայի կողմից չկա և չի կարող լինել հարյուր տոկոսանոց վերահսկողություն նրանց ներքին քաղաքականությանը»:
Մոսկվայի միջազգային հարաբերությունների պետհամալսարանի ավագ գիտաշխատող Լեոնիդ Գուսևը կարծիք հայտնեց, որ Ռուսաստանը բոլորովին շահագրգռված չէ Հարավային Կովկասում կոնֆլիկտի սրացմամբ. «Որովհետև եթե պատերազմական գործողություններ սկսվեն, ապա այն սպառնալիք կհանդիսանա անկայունություն առաջացել ոչ միայն տարածաշրջանում, այլ նաև հարևան երկրներում»:
«Ռուսաստանը ԼՂ հարցում էսկալացիա թույլ չի տա»,- վստահեցնում են մեր զրուցակիցները:
Հարցազրույցն ամբողջությամբ՝ տեսանյութում:
