Շոգ եղանակին մեր բնակիչների առաջին պահանջմունքներից մեկը ջրի հասանելիությունն է, ամռան տապին բնակիչների համար կարևոր է նաև ժամանակին կատարվող աղբահանությունը: Սակայն հենց ամենաշոգ ամռանը բնակիչների այս երկու պահանջմունքները ապահովելու փոխարեն դրանց պատասխանատուները խնդիրներ ստեղծեցին:
Հիշեցնենք՝ «Վեոլիա Ջուր» ընկերությունը 2017թ. պաշտոնապես դարձավ Հայաստանի Հանրապետության խմելու ջրամատակարարման և ջրահեռացման համակարգերի միասնական օպերատորը առաջիկա 15 տարիների համար:
«Վեոլիա ջուր» նորոգման աշխատանքների պատճառաբանությամբ առանց զգուշացման գրեթե 2 տասնյակ հազարավոր բնակիչների ջրազուրկ թողեց, իսկ «Սանիթեքը» հանդուրժում է քաղաքի ամենատարբեր անկյուններում աղբի զանգվածային կուտակումներ:
«Իրազեկ և պաշտպանված սպառող» ՀԿ նախագահ Բաբկեն Պիպոյանն «Առաջին լրատվական»-ի հետ զրույցում նկատեց, որ «Վեոլիա ջրի» հետ պայմանագիր է կնքվել՝ հաշվի չառնելով նախորդների սխալները. «Պայմանավորվածությունները սահմանված են երկարաժամկետ: Նախկին կառավարությանը ձեռնտու չէր ճշգրիտ վերահսկողության սահմանման մեխանիզմներով և բանաձևերով պայմանագրի կնքումը»:
«15 օր քաղաքացիները դժգոհում են, բայց որևէ պետական կառույցից արձագանք չկա»,- ընդգծեց Բ. Պիպոյանը: Նրա խոսքով՝ պետք է հստակ բալանսավորված, չափված մեխանիզմներ կիրառել. «Ավելին՝ պետությունը պետք է ցույց տա, որ ինքն ունի բոլոր գործիքները «Վեոլիա ջրին» խաղի կանոններ չթելադրելու կարգավիճակի բերելու համար. իրար ատամ ցույց տալու պարագայում պետության ատամներն ավելի սուր են»:
Անդրադառնալով Երևանի աղբահանության խնդրին՝ Պիպոյանը նշեց. «Փաստացի մենք քաղաքային իշխանություն չունենք, որ կտրուկ կարգավորման քայլեր ձեռնարկի, բացի դրանից՝ «Սանիթեքն» արդեն հասկանում է, որ իր բիզնես ռիսկերը սխալ է հաշվարկել, հասկանում է, որ տնտեսապես այս պայմանագրով աշխատելը ձեռնտու չէ և կողմ է, որ այդ պայամանագիրը լուծարվի…»:
Մանրամասն՝ տեսանյութում:
