Սփյուռքի նախարարությունը FAST եւ IDEA հիմնադրամների, Դիլիջանի միջազգային դպրոցի (UWC) և Impact Hub Yerevan-ի հետ համատեղ մեկնարկում է «ՆերուԺ» ծրագիրը: Սփյուռքի նախարար Մխիթար Հայրապետյանն «Առաջին լրատվական»- ի հետ զրույցում նշեց, որ «ՆերուԺ» ծրագիրը որևէ առնչություն չունի նախարարության նախկին ծրագրերին. «Սա մեր գաղափարն է: Նախարարության ներդրումը կլինի շուրջ 100 միլիոն դրամ. Այս գումարը նախորդ ծրագրերի հաշվին արված խնայողություններից է գոյացել: Մյուս գործընկերների ներդրումները գերազանցում են այս գումարը: Առաջիկայում կհրապարակենք նաև նոր գործընկերների անունները և նրանց ներդրումների չափը»:
Փոխնախարար Արամայիս Գրիգորյանի խոսքով՝ «Ներուժ» ծրագիրը Սփյուռքի նկատմամբ Հայաստանի և Սփյուռքի նախարարության վերաբերմունքի, քաղաքական դիրքորոշման տեխնլոգիական իրագործումն է: «Մենք չենք դիտարկում Սփյուռքին միայն որպես օգնություն և ֆինանսական ակտիվներ բերող: Ծրագրի մասնակիցները լինելու են 18-ից 35 տարեկան հայազգի էնտուզիաստ երիտասարդներ: Ակնկալվում է Սփյուռքի ակտիվ մասնակցությունը,- նշեց փոխնախարարը»:
Երիտասարդությունը, որպես գործընկեր եղել է անտեսված, սա մի թիրախ է, որի հետ աշխատանքը մեզ համար առաջնահերթություններից մեկն է»,- նշեց Մ. Հայարապետյանը:
Մեր զրուցակիցները նշեցին նաև, որ պատրաստի ծրագրեր չեն ակնալում, հնարավոր է դեռ իդեայի մակարդակում լինի, և 4-օրյա դասընթացներից հետո հաղթող ճանաչված բիզնես ծրագիրը ֆինանսավորման ենթակա կլինի, կտրամադրվի մինչև 15 միլիոն դրամ դրամաշնորհ:
«Ծրագրի հիմքում դրված է հայրենադարձության ինստիտուցիոնալ մեխանիզմները: Հայրենադարձությունը միայն մեծ ներգաղթ չէ,- նշեց նախարարը: – Հայրենադարձություն կարող է լինել նաև մասնագիտական հայրենադարձությունը, երբ գիտական, մտավոր պոտենցիալը բերում ես Հայաստան»:
Մ. Հայրապետյանի դիտարկմամբ՝ Սփյուռքը Հայաստանին Հայաստանն էլ Սփյուռքին դեռևս լավ չեն ճանաչում: Նրա խոսքով՝ Սփյուռքը չափազանց բազմաշերտ ու բազմերանգ է՝ իր խնդիրներով. «Խորքային առումով չենք պատկերացնում խնդիրները… Խնդիրները շատ են ու բարդ, պետք է լինել սառնասիրտ»:
Մանրամասն՝ տեսանյութում:
