Արթուր Աղաբեկյանի հայրական առանձնատանը և օժանդակ շինություններում խուզարկությունը կատարվել է Մանվել Գրիգորյանի վերաբերյալ գործի շրջանակներում

Արցախի նախագահի նախկին խորհրդական գեներալ-լեյտենանտ Արթուր Աղաբեկյանի հայրական առանձնատանը և օժանդակ շինություններում օրեր առաջ խուզարկությունը կատարվել է ԱԺ պատգամավոր Մանվել Գրիգորյանի վերաբերյալ գործի շրջանակներում:

Այդ մասին, «Փաստինֆո»-ի հարցին ի պատասխան, հայտնեցին Հատուկ քննչական ծառայության լրատվական ծառայությունից:

Իսկ թե ի՞նչ է հայտնաբերվել կամ արդյո՞ք կասկած հարուցող ինչ-որ բան հայտնաբերվել է հարցին՝ ՀՔԾ-ից հրաժարվեցին տեղեկություն տրամադրել:

Միևնույն ժամանակ հայտնի է նաև, որ Աղաբեկյանը դատավարական որևէ կարգավիճակ չունի:

Հիշեցնենք, որ հուլիսի 14-ին Արթուր Աղաբեկյանն իր ֆեյսբուքյան էջում գրառում էր կատարել, որ հուլիսի 13-ին խուզարկություն է կատարվել Արցախի Հանրապետության իշխանությունների կողմից հիմնադրված «Մետաքսկոմբինատ» ՓԲ ընկերությունում գործունեություն ծավալող 11 իրավաբանական ընկերություններում, Մեծ Թաղեր գյուղում գտնվող իմ հայրական առանձնատանը, նրա հարակից շինություններում և Տողի «Նոր Կյանք» ջրաշխարհում, նպատակ ունենալով հայտնաբերելու 2016 թվականի ապրիլին Հայաստանից և արտերկրից ստացված օգնություններ և օրենքով արգելված այլ իրեր:

Աղաբեկյանը նաև նշել էր, որ դատարանի որոշմանն համաձայն՝ իբր ինքը յուրացրել է տրամադրված օգնությունը, որի մի մասն էլ փոխանցել է Մանվել Գրիգորյանին:

«Այս աստիճան խայտառակ և շինծու մեղադրանքները կարելի է սպասել միայն չկայացած դատաիրավական համակարգից:

Գրավոր դիմել եմ Արցախի Հանրապետության Գլխավոր դատախազին և ԱԱԾ-ին՝ նմանատիպ խայտառակ որոշման գործադրումը Արցախի Հանրապետությունում հանձն առնելը պարզաբանելու նպատակով:

Իսկ ինչ վերաբերում է ՀՀ ԱԱԾ-ի կողմից տրամադրված օպերատիվ տվյալներին, դիմում եմ Հայաստանի Հանրապետության ԱԱԾ տնօրենին՝ ուսումնասիրել ձեռք բերված օպերատիվ տվյալները՝ հաշվի առնելով այն հանգամանքը, որ 2015 թվականի մայիսից ընդհանրապես չեմ շփվել Մանվել Գրիգորյանի հետ, Ապրիլյան պատերազմի ժամանակ հանդիպել եմ նրան 2 անգամ՝ ԱՀ Նախագահի պաշտոնական ընդունելությունների ժամանակ:

Ամենակարևորը, ՀՀ-ից և արտերկրից ստացված օգնությունների ստացման և բաշխման հանձնաժողովի համակարգող չեմ եղել, եղել եմ միայն օգնություն ուղարկող իրավաբանական և ֆիզիկական անձանց խորհրդատվություն տրամադրող, և հանձնաժողովի քարոզչական մասով պատասխանատու:

Պարոնա՛յք, մի խայտառակեք «ռեսպուբլիկան»:

Ակնկալում եմ Արցախի Հանրապետությունում քաղաքական գնահատական տեղի ունեցածի մասով, եթե օպերատիվ տվյալները Արցախի Հանրապետության կառավարությունը և պատկան մարմինները չեն տրամադրել»,- ասվում է Արթուր Աղաբեկյանի գրառման մեջ:

Հ.Գ. Ի դեպ, իմ առանձնատունը խուզարկվել է 3 անգամ. առաջինը երկուսը խորհրդային զորքերի և ադրբեջանական ՕՄՕՆ-ի կողմից՝ համագյուղացիներիս բռնության գործադրմամբ, իսկ վերջինը, ինչպես կասեր, «Շմայսը»՝ քաղաքավարի ներխուժել են օրենքի տառին համապատասխան:

Հ.Գ. Դատավորն ապրած կենա՝ ոչ թե Ստեփանակերտի Թումանյան 109 հասցեում գտնվող Ա.Աղաբեկյանի կարի արտադրամաս, այլ Թումանյան 99 հասցեում գործող «Մետաքսկոմբինատ» պետական ընկերություն, որի 15000 քառ. մետր տարածքում գործում են 11 ընկերություններ, որոնցից 3-ը կարի արտադրություններ են: Ոչ թե Ստեփանակերտի ջրաշխարհ, այլ Տող գյուղի տարածքում գործող «Նոր Կյանք» ջրաշխարհ՝ տարածք, որը ազատագրել ենք 20 ընկերներով, որոնցից 18-ը զոհվել են Արցախյան ազատամարտում, և նրանց հիշատակը հավերժացնելու համար կառուցել ենք «Նոր Կյանք» հանգստի գոտին»,- գրառել էր Աղաբեկյանը։