«Ակնհայտ էր, որ որևէ միջոցի առջև ՀՀԿ-ն կանգ չէր առնելու՝ Երևանն իրենց ձեռքին պահելու համար, և մենք մարտավարական առումով այդ պահին քաղաքապետի ընտրությանը մասնակցելը սխալ համարեցինք, այս անգամ եթե լինեն ավագանու արտահերթ ընտրություններ, մենք անպայմանորեն կմասնակցենք, արդեն ունենք որոշում»,- «Առաջին լրատվական»- ի հետ զրույցում ասաց ԱԺ «Ծառուկյան» խմբակցության պատգամավոր Նաիրա Զոհրաբյանը՝ հավելելով, որ Երևանը Հայաստանի մի մեծ, ավելի շատ քաղաքականացված հատվածն է, և նոր էջից սկսելը ճիշտ կլինի:
Հարցին, թե Էդուարդ Բաբայանին մեղադրանք առաջադրելն ու կալանավորելն արդյո՞ք մասնավոր դեպք է համարում, Ն. Զոհրաբյանը պատասխանեց. «Ես չեմ ուզում քաղաքականացնել հարցը: Ուզում եմ հավատալ, որ մեր երկրում այլևս անցել է քաղաքական դրդապատճառներով ինչ-որ մեկին կալանավորելու ժամանակները, անցել են մարդուն կալանավորելով որևէ քաղաքական թիմի ինչ-որ բան հասկացնելու ժամանակները: Ես հույս ունեմ, որ գործընթացը կմնա բացառապես իրավական դաշտում: Իհարկե մեզ համար բազմաթիվ հարցականներ կան, որովհետև այսպես կոչված տուժողը և տուժողի կինը հստակ ցուցմունքներ են տվել, որ եղել են վրդովված, վիրավորված: Վյաչեսլավ Հարությունովը դեռևս ամիսներ առաջ ինձ է պարբերաբար զանգահարել և ասել, որ ուզում է հանդիպել Ծառուկյանի հետ: Ես նպատակահարմար չեմ գտել նրա խնդրանքը փոխանցել Ծառուկյանին: Եթե ես հիմա ասեմ, թե ինչ իրավական լուծում եմ տեսնում, կնշանակի, որ հարցը քաղաքականացնում եմ և փորձում եմ իրավապահ համակարգին ուղղորդել:
Ես հավատում եմ, որ մեր երկրում այլևս քաղաքական հետապնդումներ չեն լինելու և հավատում եմ, որ իրավապահ համակարգը անաչառորեն քննություն կկատարի»:
Հարցին՝ Ծառուկյանին պատկանող օբյեկտներում ստուգումներ են իրականացվում, թե ոչ, Ն. Զոհրաբյանը պատասխանեց, որ այդպիսի ստուգումներ անցկացվում են պարբերաբար. «Ստուգումներ եղել են միշտ, և Ծառուկյանն ասել է, որ ինքը բաց է ցանկացած ստուգումների համար»:
Իշխանության ներսում որևէ կնճիռ չկա՞. ի պատասխան այս հարցի՝ Ն. Զոհրաբյանը նշեց, որ խնդիրներ միշտ էլ կարող են լինել. «Սիամական երկվորյակներ չենք, որ բոլորս մտածենք ու գործենք միակերպ, կոմկուսի, Բրեժնևի ժամանակներն անցել են: Կարող են լինել խնդիրներ, և դա նորմալ է: Դա է ժողովրդավարությունը: Գլոբալ հակասություններ ԲՀԿ-ի և ՔՊ-ի, Փաշինյանի և Ծառուկյանի միջև չկան… Ուղղորդողներ կան, որոնք այս երկու քաղաքական ուժերի հետ կապ չունեն, մարդիկ կան, որոնց ձեռք չի տալիս որևէ համագործակցություն: Դրանք պարզունակ ու ծիծաղելի հոսանքներ են»:
«Քաղաքականության մեջ փոշմանելը սխալ կատեգորիա է»,- ընդգծեց Ն. Զոհրաբյանը՝ անդրադառնալով նախորդ իշխանությունների հետ ԲՀԿ-ի համագործակցությանը:
Իսկ թե ինչու հարուստներին Հայաստանում չեն սիրում, ըստ Զոհրաբյանի՝ որովհետև Հայաստանում շատ են աղքատները: Նրա խոսքով՝ մեր երկրում ամենամեծ պրոբլեմը արդարության և վստահության ճգնաժամն է:
«Մշտապես ասել եմ, որ այս «բեզպրեդելը», այս այլանդակությունը չի կարող լինել հավերժ: ԲՀԿ-ն երբեք որևէ շեմ չի անցել: Մենք եղել ենք կոալիցիայի մեջ, բայց ԲՀԿ-ի վրա երբեք չի եղել թալան, չի եղել արյուն»,- նշեց պատգամավորը:
Մանրամասն՝ տեսանյութում:
