Քրեական դատավարության օրենսգրքի նոր նախագծի հեղինակներից մեկի՝ Արդարադատության ակադեմիայի ռեկտոր Ռուբեն Մելիքյանի խոսքով, նոր նախագծի վիճահարույց հարցերից մեկի՝ ցուցմունքների դեպոնացման հարցում որոշակի փոփոխություններ են կատարել՝ չփոխելով սկզբունքները:
Նշենք, որ սա հենց այն հարցն է, որը, հատկապես փաստաբանների կարծիքով, մտահոգիչ է: Ըստ նրանց` դեպոնացման ինստիտուտը կհանգեցնի նրան, որ դատարանները դատավճռի հիմքում կդնեն մեղադրյալների, վկաների և տուժողների դեպոնացված ցուցմունքները, իսկ պաշտպանական ինստիտուտը, ըստ էության, անելիք չի ունենա:
Նախագծի հեղինակները, բնականաբար, չեն կիսում փաստաբանների մտահոգությունը: «Կատարված փոփոխություններով պարզապես ավելի են հստակեցվել երաշխիքները, որոնք պետք է նվազեցնեն ռիսկերը: Սկզբունքային փոփոխություններ չենք կատարել, պարզապես հստակեցրել ենք այն հարցերը, որոնք դատարանը պարտավոր է քննարկել մեղադրյալի հետ: Ինչպես նաև որոշակի հստակեցումներ ենք կատարել դեպոնացման ճանապարհով տրված ցուցմունքների ամրագրման հետ կապված:
Աշխատանքային խումբը շատ ուշադիր լսել է փաստարկները եւ դրանց հիման վրա որոշ շտկումներ է իրականացրել, բայց, սկզբունքնորեն, մենք շարունակում ենք պնդել մեր դիրքորոշումը»,- «Առաջին լրատվական»-ի հետ զրույցում ասաց Ռուբեն Մելիքյանը: Ռեկտորի խոսքով` քննարկումների ընթացքում իրենք մի քանի այլ հարցերում եւս փոփոխություններ են արել, բայց վերջնական հստակեցումները, բնականաբար, կարվեն Ազգային ժողովում, գարնանային նստաշրջանում, երբ նախագիծն ընդգրկվի օրակարգ:
