Էկվադորի դատական իշխանությունները երկուշաբթի որոշում են ընդունել ուղղիչ հաստատության 13 աշխատակիցների ենթարկել նախնական կալանքի: Հիշեցնենք, որ երեկ բանտից փախել էր 55 կալանավոր: Այս մասին հայտնում է RIA Novosti-ն՝ հղում անելով լատինաամերիկյան ԶԼՄ-ներին:
Ավելի վաղ հաղորդվել էր, որ բանտարկյալների փախուստի պատասխանատվությունը դրվել է բանտի բարձրաստիճան մի աշխատակցի վրա, ում կասկածել են անփութության մեջ: Բանտի պետն ու նրա մի քանի ենթականերն ազատվել են աշխատանքից:
Ներքին գործերի նախարար Խոսե Սերանոյի խոսքով՝ բանտում սկսված անկարգություններն ու դրանց հաջորդած՝ կալանավորների փախուստը եղել են լավ ծրագրված ապստամբության մաս, որի ընթացքում հանցագործները մտադիր էին ազատել նաև հարևան «Կիտո» բանտի բանտարկյալներին:
Բանտի աշխատակիցների դեմ անցկացվում է հետաքննություն: Մեղքի ապացուցման դեպքում նրանց սպառնում է 3 տարվա ազատազրկում: Փախուստի դիմած հանցագործներից դեռևս հաջողվել է բանտ վերադարձնել միայն 20-ին: