Մի քանի օրից՝ դեկտեմբերի 25-ին, կավարտվի ՀՀ անկախության 22-րդ տարեդարձի առիթով հայտարարված համաներման գործընթացը: Մինչ այդ, սակայն, հրապարակումներ եղան, թե այս հայտարարված համաներման ժամկետը երկարաձգվում է, ինչը լրացուցիչ մեկնաբանությունների և կասկածների առիթ տվեց:
Այդուամենայնիվ, ինչպես դեռևս հոկտեմբերի 3-ին, երբ ԱԺ-ում ընդունվեց համաներման նախագիծը, արդարադատության նախարար Հրայր Թովմասյանը հայտարարեց, այն կշարունակվի մինչև դեկտեմբերի 25-ը, իսկ երկարաձգման մասին խոսք, մինչ այսօր չի եղել:
Դեկտեմբերի 25-ը, սակայն, պաշտոնյաների՝ քննչական մարմինների և դատարանների համար է վերջնաժամկետ, երբ նրանք պետք է ավարտեն համաներման հետ կապված բոլոր փաստաթղթային գործընթացը: «Ժամկետը չի երկարաձգվել: Խոսքը հատկապես վերաբերում է նախաքննության փուլում գտնվող գործերին և դատարաններում ներկայումս գտնվող գործերին, որոնց դատավճիռը ուժի մեջ կմտնի համաներման կիրառմամբ: Իսկ դատապարտյալների մասով գործերը հիմնականում ավարտվել են: Բայց ժամկետը երկարաձգելու հարց չկա»,-«Ժամանակի» հետ զրույցում ասաց արդարադատության նախարարի խոսնակ Կարինե Քալանթարյանը՝ ավելացնելով, որ դեկտեմբերի 25-ից հետո, հաջորդ տարվա մեջ, եթե ինչ-որ հանցագործություն բացահայտվի, որը կատարվել է մինչև սեպտեմբերի 21-ը, և որի վրա համաներումը տարածվում է, ապա, բնականաբար, համաներումը կկիրառվի:
Նշենք, որ դեկտեմբերի 9-ին 12 քրեակատարողական հիմնարկներից ազատ է արձակվել 672 դատապարտյալ: Իսկ ավելի քան 1457 անձի նկատմամբ համաներում է կիրառվել դատարաններում: Մի փոքր այլ են Արդարադատության նախարարության ՔԿՎ այլընտրանքային պատիժների կատարման բաժնի տվյալները, ըստ որոնց հաշվառված անձանցից տարբեր հոդվածներով համաներվել է 1097 դատապարտյալ: ԱՊԿ բաժանմունքների կողմից պատժի չկրած մասը կրճատվել է 107 անձի նկատմամբ:
Նշենք, որ համաներումը մարդասիրական քայլ լինելուց բացի, որոշակիորեն լուծում է նաև քրեակատարողական հիմնարկների գերբեռնվածության խնդիրը, ինչը լուրջ խնդիր է մի շարք ՔՀԿ-ներում՝ հատկապես «Նուբարաշեն» ՔԿՀում, որտեղից ազատ է արձակվել մոտ 90 դատապարտյալ:
Մի շարք փաստաբաններ «Ժամանակի» հետ զրույցում դրական գնահատեցին համաներման գործընթացը՝ նշելով, որ այն հիմնականում ճիշտ է կիրառվում, և շատ քիչ դեպքեր են հանդիպում, երբ համաներման կիրառման հետ կապված խնդիրներ են առաջանում:
