Հայաստանի դեսպաններն ու դիվանագետները օպերատիվ կերպով ՀՀ սահմանի ուղղությամբ Ադրբեջանի գործողությունների մասին օպերատիվ կերպով տեղեկացրել են գործընկեր կառույցներին:
Լրագրողների հետ ճեպազրույցում այս մասին տեղեկացրեց ՀՀ արտաքին գործերի նախարարության մամուլի խոսնակ Տիգրան Բալայանը: Նա նկատեց, որ ոչ միայն ՀՀ սահմանին, այլև Արցախի հետ շփման գծում տեղի ունեցողն ուղղակիորեն սպառնում է Հայաստանի անվտանգությանը: «Մեր դեսպաններն ու դիվանագետները քաջ գիտակցում են, որ իրենց աշխատասենյակների ու շփման գծի միջև սահմանը շատ քիչ է, այս ամենի կրողը մենք ենք: Մենք այդ մասին պետք է ներկայացնենք և ներկայացնում ենք արտաքին աշխարհում մեր գործընկերներին, որոնք բավականին ակտիվ տեղյակ են պահվել՝ անկախ աշխատանքային օր լինել-չլինելու հանգամանքից»,-ասաց Տիգրան Բալայանը:
Անդրադառնալով հարցին, թե ինչպես են վերաբերում այն տեսակետին, որ Ադրբեջանի հետ ՀՀ սահմանին տեղակայվեն նաև ՀԱՊԿ զորամիավորումներ, որպեսզի վերջիններս, որպես գործընկեր կառույց, իրենց մաշկի վրա զգան Ադրբեջանի ոտնձգությունների հետևանքները, Տիգրան Բալայանն ասաց. «Չեմ կարծում, որ ՀՀ զինված ուժերն աջակցության կարիք ունեն նախիջևանյան հատվածում լիակատար վերահսկողություն պահպանելու հարցում: Մեր սահմանների հսկողության հանձնառությունը դրված է ՀՀ ԶՈՒ-ի վրա, և, ինչպես ցույց տվեցին վերջին երկու օրերի զարգացումները, մենք վստահությամբ և արդյունավետ կերպով իրականացնում ենք դա»:
