Արդեն մոտ մեկ շաբաթ է՝ Մեծամոր քաղաքում պահանջում են քաղաքապետ Ռոբերտ Գրիգորյանի հրաժարականը: Ինքը՝ Գրիգորյանը, չի պատրաստվում հրաժարական տալ և նշում է, որ ընդամենը մեկ ընտանիք է պահանջում իր հրաժարականը, իսկ դա առիթ չէ հեռանալու համար:
Քաղաքապետի հրաժարականի պահանջով ստեղծված նախաձեռնող խմբի անդամ, նախկին դաշնակցական Ավետիք Հարությունյանը «Առաջին լրատվական»-ի հետ զրույցում ասաց, որ իրենք անձի խնդիր չեն դրել, իրենց պահանջը կապված է քաղաքի ոչ նորմալ վիճակի հետ: Նրա խոսքով՝ քաղաքում աղբահանություն չի իրականացվում, ճանապարհները աղետալի վիճակում են:
Անդրադառնալով իր անձի շուրջ պտտվող այն խոսակցություններին, թե ինքը գեներալ Մանվել Գրիգորյանի կողմնակիցն է, նշեց՝ իր եղբայրը Ղարաբաղյան պատերազմի ժամանակ կռվել է 5-րդ բրիգադում՝ Մանվել Գրիգորյանի հրամանատարության տակ, սակայն հետագայում խնդիրներ են առաջացել, և իրենց հարաբերությունները խզվել են Գրիգորյանի հետ:
«95 թվականին 2,5 հա հող վերցրին մեր ձեռքից, 2005-ին էլ կես հեկտար պարտադրեցին, որ հանձնենք իր եղբոր որդուն: Մանվելական ենք, բա էդ դեպքում ո՞նց է լինում: 2012-ին էլ Մեծամորում առաջադրվել էին Մանվել Գրիգորյանի եղբայրը՝ Աշոտ Գրիգորյանը (մականունը՝ Ճանճ) և որդուս ընկերը: Ես այդ ժամանակ Վայքի ռազմական ոստիկանության պետն էի, ամեն օր հեռախոսային կռիվ էի ունենում Մանվել Գրիգորյանի հետ: Գնում զեկուցում էին, որ Ավոյի տղան հակառակ է աշխատում Աշոտին, չենք կարողանում դեմն առնել: Անգամ բանը հասավ նրան, որ ինձ սպառնացին՝ եթե Հայաստանից դուրս չգանք, վատ է լինելու: Ստիպված վիզան խփեցինք՝ որդուս մեկ ամսով ուղարկեցինք դուրս: Մանվելական ենք, բա ո՞նց է էդպես լինում: Մենք 2012-ից ոչ մի շփում չենք ունեցել:
Ռոբերտ Գրիգորյանը և իր թիմակիցները սկսեցին զազրախոսություններ տարածել քաղաքում: Եթե ես մանվելական էի, ինչպե՞ս եղավ, որ Մանվել Գրիգորյանին պատկանող սրճարանում ընդհանուր հայտարարի են եկել, որ պետք է սատարեն Ռոբերտ Գրիգորյանին: Իսկ Մանվել Գրիգորյանը նման բաները հենց այնպես չէր անում: Բա մանվելական էի, ինչո՞ւ չասեցին՝ Ավետիքին օգնեք, ոչ թե Ռոբերտին»,- մանրամասնեց մեր զրուցակիցը: Նրա վստահեցմամբ՝ քաղաքապետ Ռոբերտ Գրիգորյանի տանիքը Վաչագան Ղազարյանը՝ Սերժի Վաչոն է եղել, ում ձերբակալությունից հետ Գրիգորյանը լքեց Հանրապետական կուսակցությունը. «Ինքը նոր «կռիշ» է ման գալիս»:
Ավետիք Հարությունյանը ցանկացավ շեշտել, որ Նիկոլ Փաշինյանի սկսած շարժման ժամանակ, երբ քաղաքի թիվ 2 դպրոցի աշակերտները պաստառներով դուրս էին եկել դասադուլի, քաղաքապետ Ռոբերտ Գրիգորյանը նրանց փորձել է խանգարել. «Ինքը երբ երեխաներին հարցնում էր՝ ո՞վ է ձեզ սովորեցրել նման բաներ գրել պաստառների վրա, երեխաներն ասում էին՝ ինտերնետից ենք քաշել: Ինքն էլ ասում էր՝ ինտերնետում պոռնո էլ կա, պետք է գրե՞ք»:
Հարցազրույցն ամբողջությամբ՝ տեսանյութում: