«Առաջին լրատվական»-ն այսօր ահազանգ էր ստացել Երևանի թիվ 92 մանկապարտեզի աշխատակազմից և մանկապարտեզի ներառական հատված հաճախող փոքրիկների ծնողներից։ Ահազանգով Մալաթիա Սեբաստիա համայնքում գտնվող մանկապարտեզում էինք, որտեղ մեզ ագրեսիվ պահվածքով դիմավորեցին աշխատակիցները՝ հորդորելով դուրս գնալ տարածքից և չտեսանկարահանել։ Ինչևէ, մեզ ահազանգած աշխատակիցները ներկայացրին իրավիճակը։
Ծնողները նշեցին, որ իրենք ամեն ամիս գումար են հավաքում տարբեր իրեր գնելու համար՝ անձեռոցիկ, մաքրության պարագաներ, անգամ անսարք իրերը ծնողների միջոցներով է վերանորոգվում։ Ծնողները և հատուկ մանկավարժները դիմել են ոստիկանություն, որտեղ ներկայացրել են բոլոր ապացույցներն այն մասին, որ տնօրեն Կարինե Հարությունյանը գումարներ է վերցրել ծնողներից՝ երեխաներին մանկապարտեզում գրանցելու համար։
Մանկապարտեզի ներառական հատվածի բողոքող աշխատակիցները և այսպես ասած, տնօրենի համակիրները, վիճաբանության մեջ մտան միմյանց հետ։ Ինքը՝ տնօրենը հրաժարվեց որևէ մեկնաբանություն տալ կատարվածին՝ հորդորելով իր աշխատակիցներին, որոնք հանուն արդարության պետք է նշենք, որ մանկավարժ կոչումից շատ հեռու էին, համենայն դեպս նրանց պահվածքն էր դա ապացուցում, մեզ դուրս «հրավիրել» մանկապարտեզի տարածքից։
Ներառական խնդիրներ ունեցող երեխաների ծնողները և հատուկ մանկավարժները հույս ունեն, որ իրավապահները համապատասխան ընթացք կտան գործին և արդարությունը կվերականգնվի։ Իսկ թե ինչու մինչ այս պահը չեն բարձրաձայնել խնդիրների մասին, նրանք նշում էին, որ հույս չեն ունեցել, որ ինչ-որ մեկը կարձագանքի իրենց բողոքին։
Ցերեկային խնամքի կենտրոնի մասնագիտական կահույքի տրամադրումը և մասնագետների վերապատրաստումը իրականացվել է «Արաբկիր» միացյալ մանկական բարեգործական հիմնադրամի կողմից, իսկ մնացած անհրաժեշտ գույքն ու կենցաղային իրերը հատկացրել է Երևանի քաղաքապետարանը: Քաղաքապետարանի կողմից տրամադրվել են նաև խոհանոցային պարագներ՝ կաթսաներ, թեյնիկներ և այլն:
Ի դեպ՝ նշենք, որ հիշյալ մանկապարտեզի ցերեկային խնամքի կենտրոնի մասնագիտական կահույքի տրամադրումը և մասնագետների վերապատրաստումը իրականացվել է «Արաբկիր» միացյալ մանկական բարեգործական հիմնադրամի կողմից, որը պատկանում է ԱԺ նախագահ Արա Բաբլոյանին, իսկ մնացած անհրաժեշտ գույքն ու կենցաղային իրերը հատկացրել է Երևանի քաղաքապետարանը: Իսկ 2015 թվականին հատուկ կարիքներ ունեցող երեխաների համար ստեղծված մասնաշենքի բացմանը մասնակցել են Սերժ Սարգսյանի կինը՝ Ռիտա Սարգսյանը, ՀՀ առողջապահության նախկին նախարար Արմեն Մուրադյանը, աշխատանքի և սոցիալական հարցերի նախկին նախարար Արտեմ Ասատրյանը, քաղաքապետ Տարոն Մարգարյանը և այլք։
Մանրամասները՝ տեսանյութում
