Եվրամիությունն ու Թուրքիան դեկտեմբերի 16-ին ստորագրել են Թուրքիայի տարածքից ԵՄ երկրներ ներթափանցած անօրինական ներգաղթյալներին վերադարձնելու մասին համաձայնագիր: Այս մասին հայտնում է Reuters գործակալությունը:
Միաժամանակ կողմերը պայմանավորվել են շենգենյան գոտի թուրք քաղաքացիների մուտքի ընթացակարգի պարզեցման բանակցությունների մեկնարկի շուրջ: France-Presse-ի փոխանցմամբ՝ դա կարող է տեղի ունենալ արդեն 2017-ին: Ռեադմիսիայի մասին համաձայնագրի ստորագրումը եղել է Եվրոպա թուրքերի մուտքի կանոնների պարզեցման առանցքային պայմաններից մեկը:
Այդ երկու համաձայնագրերի վերաբերյալ բանակցություններն ընթացել են մի քանի տարի: Անկարան երկար ժամանակ չի ցանկացել ստորագրել ռեադմիսիայի մասին համաձայնագիրը՝ չվստահելով այցագրային ռեժիմի շուտափույթ դյուրացման մասին ԵՄ հայտարարություններին:
Թուրքիայի տարածքով է անցնում Աֆրիկայից և Ասիայից դեպի Եվրոպա անօրինական ներգաղթյալների տարանցման հիմնական երթուղիներից մեկը: Վերջին տարիներին ներգաղթյալների հոսքը զգալիորեն մեծացել է արաբական և աֆրիկյան մի շարք երկրներում հակամարտությունների ու քաղաքական անկայունության պատճառով:
