ՀՀ ոստիկանապետ Վալերիյ Օսիպյանը վստահեցնում է՝ անձին ձերբակալում են բավարար հիմքեր ունենալու պարագայում: Այս մասին պաշտոնյան լրագրողների հետ ճեպազրույցում նշեց՝ անդրադառնալով Մանվել Գրիգորյանի կնոջը՝ Նազիկ Ամիրյանին ձերբակալելուն: Նրա խոսքով՝ կան բացատրություններ ու ցուցմունքներ, որ Նազիկ Ամիրյանի ցուցումով են ԵԿՄ շենքից մեքենաներով տեղափոխվել պահածոները: «Այդպես է եղել, ես պնդում եմ, կան համապատասխան բացատրություններ, ցուցմունքներ, որով մենք տեղեկություններ ենք ստացել, որ հենց տիկին Նազիկի ցուցումով են փորձել տեղափոխումն իրականացնել,- ասաց ոստիկանապետը:
Լրագրողը հարց ուղղեց, թե ինչպես է լինում, որ ոստիկանությունը սխալ հասցեով է գնում, որոշ մարդկանց ձերբակալում է, հետո բաց թողնում, որին ի պատասխան Վալերիյ Օսիպյանը նախ խնդրեց հիշեցնել, թե երբ են իրենք սխալ հասցեով գնացել ու հավելեց. «Ոստիկանությունը մոտավորապես չի աշխատում, ոստիկանությունը մի գերատեսչություն է, որ պարտադիր հիմք ու տեղեկություններ պետք է լինեն: Սխալ հասցեով չենք մտել ու չենք էլ պատրաստվում մտնել»:
