Վրաստանի նախկին նախագահ Միխեիլ Սաակաշվիլին հոկտեմբերի 25-ին Սուրբ Խաչ եկեղեցի այցելելու ճանապարհին վիրահայ քաղաքական գործիչ, նախկին քաղբանտարկյալ Վահագն Չախալյանի հետ տեղի ունեցած վիճաբանությունից հետո խոստացել էր օրեր անց կրկին հանդիպել նրա հետ:
«Առաջին լրատվական»-ի հետ զրույցում, սակայն, Չախալյանը նշեց, որ դա Սաակաշվիլու հերթական անպատասխանատու հայտարարությունն էր. իրենց այդ հանդիպումից հետո այլևս ոչինչ տեղի չի ունեցել: «Չէ, ի՞նչ պիտի կատարվեր, ուղղակի հիմար-հիմար դուրս էր տալիս, էլի: Ուղղակի էդտեղ ասում էր, էլի, մի հինգ օրից ինքն արդեն ոչ թիկնապահ ուներ, ոչ բան ուներ, էլ ի՞նչ պիտի հանդիպեր: Ինքը ոչ էլ գալու էր, պարզ է դա, ուղղակի տղայական բնազդն իր մեջ խոսեց էդ ժամանակ: Ինքը ոչ ադեկվատ մարդ է, տաքացած ժամանակ անպատասխանատու հայտարարություններ արեց, ինչպես շատ անգամներ է արել, դա առաջին անգամ չէր»,- ասաց նա՝ հավելելով, որ պարզապես նախկին նախագահը ցույց տվեց առաջին հերթին իր անհարգալից վերաբերմունքը նախագահի ինստիտուտի հանդեպ:
Հարցին՝ վրացական նոր իշխանություններից գո՞հ է արդյոք, Չախալյանը պատասխանեց, որ գոհ լինելը հարաբերական է, դեռ սպասում են, ավելի շատ սպասողական վիճակ է, իրենք իրենց պարտականություններն ու աշխատանքները կատարում են, ամեն դեպքում ակնկալիքներ, հույսեր կան վրացական նոր իշխանություններից, որ իրենք, թեկուզ ոչ բոլոր հարցերում, բայց գոնե խնդիրների որոշ մասին լուծում տալու են: Եղած խնդիրների մի մասն, ըստ Չախալյանի, արդեն լուծվել է. Ազգային անվտանգության կողմից ճնշումներ չկան, ընտրություններն ազատ անցան:
«Ջավախքում նման ընտրություններ չեն հիշում, մեր պայքարի մեջ կարևոր խնդիրներից էր նաև, որ արդար ընտրություններ լինեն, դրանք ժողովրդի կամքն արտահայտեն, ինքը որոշի՝ ում է ընտրում, ինչու: Գարնանը ողջ Վրաստանում ՏԻՄ ընտրություններ են սպասվում, դրանք վերջնականապես ցույց կտան՝ արդեն գրանցված ձեռքբերումները հիմնակա՞ն են, թե՞ ժամանակավոր բնույթ ունեին և կապված էին ընտրությունների ժամանակահատվածի հետ: Առաջնահերթ էր այս վախի մթնոլորտը վերացնել, որ մարդիկ կարողանային բնականոն կյանքով ապրել, աշխատել, վայելել աշխատանքի արդյունքները, այս խնդիրը լուծված է»,- ասաց նա՝ նշելով, որ հիմա սպասում են Ազգային փոքրամասնությունների խարտիայի վերաբերյալ պառլամենտի որոշմանը:
Չախալյանի փոխանցմամբ՝ տարիներ շարունակ Սաակաշվիլու ռեժիմն այդ խարտիայի ընդունումը վատ գույներով է ներկայացրել, այնքան վատ, որ «շատերը կարծում են, թե դրանով երկիրը պիտի փուլ գա», հիմա բացատրական աշխատանքներ են տանում, որ ոչ մի երկիր այն ընդունելով չի փլվել, ավելին՝ կայունացել է: Չախալյանը նաև ընդգծեց՝ ջավախահայության համար, իր խնդիրները լուծելուց բացի, կարևոր է, որ Հայաստանն ուժեղ լինի, տնտեսապես հզոր լինի, դրանով մեծ օգուտ տված կլինի իրենց: