Սյունիքի մարզի ընդհանուր իրավասության դատարանում Դավիթ Գրիգորյանի նախագահությամբ ընթանում է Հակոբ Թոսունյանի գործի դատավարությունը:
Ըստ մեղադրանքի՝ 54-ամյա Հակոբ Թոսունյանը ՀՀ ոստիկանության Սյունիքի մարզային վարչության Կապանի բաժնի պետի օպերատիվ գծով տեղակալ Գագիկ Դանիելյանի և Սյունիքի մարզի քննչական բաժնի քննիչ Արման Ենգոյանի կողմից առանձնապես ծանր հանցագործության վերաբերյալ քրեական գործով կեղծ ապացույց ստեղծելուն օժանդակելու դիտավորությամբ 2012 թվականի ձմռանը Քաջարան քաղաքում գործող, սեփականության իրավունքով իրեն պատկանող առևտրի կենտրոնում Նոնա Հ.-ի և նրա զինծառայող որդու առողջությանը վնաս պատճառելու սպառնալիքով Նոնա Հ.-ին հարկադրել է 2010 թվականի օգոստոսի 28-ին Քաջարանի մշակույթի տան մոտ գտնվող զբոսայգում տեղի ունեցած հանցագործության դեպքի առթիվ՝ Գ. Պապյանի սպանության վերաբերյալ, տալ սուտ ցուցմունքներ՝ Ս. Սահակյանի գործողությունների վերաբերյալ:
Այնուհետև Թոսունյանը Նոնա Հ.-ի՝ սուտ ցուցմունք տալու պատրաստակամության մասին հայտնել է Գագիկ Դանիելյանին և Արման Ենգոյանին:
Դանիելյանն ու Ենգոյանը առանձնապես ծանր հանցագործության վերաբերյալ քրեական գործով կեղծել են ապացույց՝ որպես վկա են ներգրավել Նոնա Հ.-ին, ով Դանիելյանի և Ենգոյանի ուղղորդմամբ տվել է ակնհայտ սուտ ցուցմունք այն մասին, թե ականատես է եղել Ս. Սահակյանի կողմից Քաջարանի զբոսայգու հարակից տարածքում գործող սրճարանից խոհանոցային դանակ վերցնելուն, Գ. Պապյանի հետ վիճաբանելուն, ինչպես նաև դանակի բռնակով Պապյանի գլխին հարվածելուն, մինչդեռ Նոնան ոչ միայն ականատես չի եղել, այլև հանցագործության կատարման պահին առհասարակ դեպքի վայրում չի գտնվել:
Քրեական գործի նախաքննության օրինականության նկատմամբ դատախազական հսկողություն և դատավարական ղեկավարում իրականացրած, նույն քրեական գործով մեղադրող, Սյունիքի մարզի դատախազի տեղակալ Էդիկ Հովսեփյանի միջնորդությամբ Ս. Սահակյանի գործով դատաքննության ընթացքում Նոնա Հ.-ն հարցաքննվել է որպես վկա և տվել վերոհիշյալ սուտ ցուցմունքը:
Ընդ որում՝ Հակոբ Թոսունյանի գործն ընդամենը մի մաս է, որն անջատվել է ՀԿԳ քննության վարչությունում մի խումբ անձանց կողմից Գ. Պապյանի սպանության, խուլիգանություն կատարելու, վկային սուտ ցուցմունք տալուն հարկադրելու, առանձին պաշտոնատար անձանց կողմից պաշտոնեական դիրքը չարաշահելու և առանձնապես ծանր հանցագործության վերաբերյալ քրեական գործով ապացույց կեղծելու, առանձնապես ծանր հանցագործության մեղադրանքի առնչությամբ քննվող քրեական գործով կեղծ եզրակացություն տալու դեպքերի առթիվ քննվող քրեական մեծ գործից:
Հակոբ Թոսունյանին մեղադրանք է առաջադրված ՀՀ քրեական օրենսգրքի 340 հոդվածի 2-րդ մասով, 38-349 հոդվածի 3-րդ մասի 1-ին կետով:
Թոսունյանի խափանման միջոցը կալանավորումն է:
Ընդհանուր իրավասության դատարանը մերժել է Հակոբ Թոսունյանի շահերի պաշտպան Վ. Մանուկյանի միջնորդությունը՝ իր պաշտպանյալի խափանման միջոց կալանավորումը չհեռանալու մասին ստորագրությամբ փոխարինելու վերաբերյալ: