«Հեռուստաընկերությունների մասով վարչապետի գրառումը խոսքի ազատության սահմանափակման փորձ չէ։ Դա կարող է դիտարկվել որպես միջամտություն»,- «Առաջին լրատվական»-ի հետ զրույցում ասաց Խոսքի ազատության պաշտպանության կոմիտեի նախագահ Աշոտ Մելիքյանը՝ անդրադառնալով վարչապետի գրառմանը, որտեղ Նիկոլ Փաշինյանը նշել էր, որ որոշ հեռուստաընկերություններ հակապետական քարոզչություն են իրականացնում՝ «օգտվելով խոսքի ազատության անսահմանափակ հնարավորությունից»։ «Մի՛ արեք։ Պարզապես մի՛ արեք»,- վերջում ասել էր վարչապետը։
Վարչապետի այս գրառումից հետո ՀՀԿ խմբակցության պատգամավոր Արմեն Աշոտյանը լրագրողական կազմակերպությունների ուշադրությունն էր հրավիրել խնդրի վրա, թե արդյոք Նիկոլ Փաշինյանի կողմից խոսքի ազատության սահմանափակման փորձ չի իրականացվում։
Աշոտ Մելիքյանը զարմանում է հատկապես Արմեն Աշոտյանի արձագանքով, քանի որ ժամանակ առաջ բոլորովին հակառակ պատկերն էր։ «Իսկապես հետաքրքիր տրանսֆորմացիաներ են տեղի ունենում։ Երբ Արմեն Աշոտյանը, լինելով իշխող ՀՀԿ-ի փոխնախագահ, Հանրային հեռուստաընկերությունում վարում էր «Եռանկյունի» հասարակական-քաղաքական հաղորդումը, և լրագրողական կազմակերպությունների փորձագետները, և անձամբ ես ասում էի, որ դա անթույլատրելի է, նրա համար մեր կարծիքը որևէ արժեք չուներ։ Երբ մենք ասում էինք, որ հայաստանյան հեռարձակման ոլորտը և «Հեռուստատեսության և ռադիոյի մասին» օրենքն արմատական բարեփոխումների կարիք ունի, մեզ անտեսում էին։ Երբ պահանջում էինք բացահայտել և պատժել «Էլեկտրիկ Երևան»-ի և Սարի թաղի իրադարձությունների ժամանակ լրագրողներին բռնությունների և հետապնդումների ենթարկողներին, իշխանություններն ընդամենն իմիտացիոն նախաքննություն սկսեցին։ Իսկ հիմա Արմեն Աշոտյանի համար մեր կարծիքը կարևոր դարձավ։ Անկեղծ ասած՝ այստեղ նաև 2 միտում է նկատվում։ Առաջինը՝ փորձել օգտագործել անկախ լրագրողական կազմակերպություններին ինչ-ինչ քաղաքական նպատակների համար, և երկրորդ՝ հնարավորինս շեղել հասարակության ուշադրությունը՝ այսօր տեղի ունեցող շատ ավելի կարևոր իրադարձություններից։ Կարծում եմ՝ չի հաջողվի թե մեկը, թե մյուսը»,-ասաց Մելիքյանը՝ հավելելով. «Անկախ լրագրողական կազմակերպությունները և մասնավորապես Խոսքի ազատության պաշտպանության կոմիտեն, անթույլատրելի համարելով ցանկացած իշխանության միջամտությունը կամ ճնշումը լրատվամիջոցների նկատմամբ, միշտ արտահայտել է իր դիրքորոշումը ոլորտի ցանկացած խնդրի վերաբերյալ։ Քանի որ հայաստանյան լրատվամիջոցները բաժանված են տարբեր քաղաքական ճամբարների, վերջին ժամանակներում հատկապես աչքի են ընկնում կողմնակալ, աչառու հրապարակումներով և հաղորդումներով»։
Մելիքյանը նշեց, որ նոր կառավարությունը հիմա այն ականներ է տեսնում, որը, որ թողել է նախորդ իշխանությունը։ «Փաշինյանի այդ գրառումը շատ էմոցիոնալ է, և հաշվի առնելով, որ նա վարչապետ է, այդ կոչը կարող է դիտվել որպես միջամտություն հեռուստաընկերության գործերին։ Ես ինքս նայել եմ այդ հաղորդումը, տեսել եմ լրագրողական էթիկայի խախտումներ, և վարչապետը կարող էր դիմել լրագրողական կազմակերպություններին, դիտորդ մարմնին և խնդրել փորձագիտական եզրակացություն տալ։ Սա կլիներ ճիշտ որոշում հեղափոխական պայմաններում»,- ասաց Մելիքյանը՝ հավելելով, որ ոլորտը կարգավորման լուրջ անհրաժեշտություն ունի։ Օրենսդրական կարգավորումը անհրաժեշտություն է»։
