«Հայաստանի ազգային արխիվ» ՊՈԱԿ-ի աշխատակազմը բաց նամակով դիմել է ՀՀ tարածքային կառավարման եւ զարգացման նախարար Սուրեն Պապիկյանին: Ստորև ներկայացնում ենք այն առանց խմբագրման.
«Հայաստանի Հանրապետության տարածքային կառավարման եւ զարգացման նախարար պարոն Սուրեն Պապիկյանին
Հարգարժան պարոն Պապիկյան, «Հայաստանի ազգային արխիվ» ՊՈԱԿ-ի ողջ աշխատանքային կոլեկտիվը վրդովմունքով ընդունեց իրենց երկարամյա, վաստակաշատ ու մեր պետականությանը նվիրված ղեկավարի՝ պատմական գիտությունների դոկտոր, ՀԱԱ տնօրեն Ամատունի Վիրաբյանին պարտադրված հրաժարականի պահանջը:
Ա. Վիրաբյանի տնօրենության տարիներին ՀԱԱ-ն հիրավի հեղափոխական, համակարգային փոփոխություններ է ապրել և ունի աննախադեպ զարգացում, վայելելով նաև միջազգային բարձր հեղինակություն: ԶԼՄ-ներում ապատեղեկատվություն է տարածվել իբր թե Ա. Վիրաբյանի ազատման դիմում գրելու վերաբերյալ, ինչն ամենևին իրականությանը չի համապատասխանում, որը խաթարել է ՀԱԱ բնականոն աշխատանքը:
Միանշանակ ողջունելով մեր հանրապետությունում տեղի ունեցած հեղափոխական զարգացումները, ստեղծված նոր իրականությունը, և օգտվելով այդ ամենի արդյունքում ձևավորված ժողովրդավարության այս ալիքից, այսօր խնդրում և պահանջում ենք Ձեզնից հանդիպում ՀԱԱ աշխատանքային կոլեկտիվի հետ: 20.06.2018թ.
«Հայաստանի ազգային արխիվ» ՊՈԱԿ-ի աշխատանքային կոլեկտիվի անունից»:
