ԱԺ արտաքին հարաբերությունների մշտական հանձնաժողովի նախագահ Արտակ Զաքարյանը «Առաջին լրատվական»-ի հետ զրույցում անդրադառնալով այն դիտարկումներին, թե Հայաստանը, անդամակցելով Մաքսային միությանը, կորցնում է իր ինքնիշխանության մի մասը, ասաց. «Ինքնիշխանության կորստի խնդիրը մեխանիկական խնդիր չէ, որ մենք դիտարկում ենք: Վերազգային մարմինը, որին որոշակի լիազորություններ պետք է փոխանցվի տնտեսական կառավարման համար, համաշխարհային կարևորություն ունեցող բազմաթիվ դեպքերից մեկն է՝ այնպես, ինչպես Եվրամիության անդամ շատ երկրներում տնտեսական քաղաքականության որոշ հատվածը փոխանցվում է եվրահանձնաժողովին, կամ օրենսդրական, իրավական գործունեության որոշակի խնդիրներ, իրենց պատգամավորների միջոցով, լիազորվում են Եվրոպական խորհրդարանին»:
Արտակ Զաքարյանի խոսքով՝ սա վերազգային պետությունների գործունեություն է և ժամանակակից աշխարհում շատ պրակտիկ և լայն տարածում ունի:
«Պարզապես որոշ գործառույթներ իրականացնելու համար, բնականաբար, պետք է լիազորի վերազգային մարմնին, որովհետև եթե մենք ասում ենք՝ տնտեսական համատեղ դաշտ, միասնական մաքսային ռեժիմ, ազատ տնտեսական հարաբերություն՝ առանց մաքսային կանոնակարգերի, դա ենթադրում է, որ վերազգային մարմինը պետք է հնարավորություն ունենա դրանք դիտարկելու, վերահսկելու: Այսինքն՝ այստեղ մի քիչ տեղին չեմ համարում ինքնիշխանության կամ սուվերենության մաս տրամադրելու մասին արտահայտությունը»,- ասաց նա:
Հետաքրքրվեցինք նաև, թե փաստորեն այսուհետ Հայաստան-ԵՄ հարաբերությունները զուտ քաղաքակա՞ն բնույթ են կրելու. «Քաղաքական, հումանիտար, մշակութային, ժողովրդավարական հաստատությունների զարգացման:
Ես չեմ բացառում նաև տնտեսական համագործակցությունը, որովհետև, այնուամենայնիվ, Հայաստանը շարունակում է իր տնտեսական հարաբերությունները, և այսօր էլ Հայաստանի արտահանման զգալի հատվածը բաժին է ընկնում Եվրամիության տարածքի պետություններին: Դա որևէ կերպ չի սահմանափակվելու՝ իհարկե որոշակի փոփոխված ռեժիմներով, որոշակի փոփոխված արդեն նոր ուղղվածություններով, բայց դրանք, իհարկե, լինելու են»:
Տեսանյութում տեխնիկական խնդիրների պատճառով բացակայում է Արտակ Զաքարյանի պատասխանը մեր այն հարցին, թե հնարավո՞ր է ՄՄ-ին անդամակցելուց հետո Հայաստանի և Ղարաբաղի միջև մաքսային անցակետ դրվի: Զաքարյանն այդ հարցին պատասխանել է. «Ես նման բան չեմ պատկերացնում»:
