Այսօր ՀՅԴ-ի, «Ժառանգության» և ՍԴՀԿ երիտասարդները «Արմենիա Մարիոթ» հյուրանոցի մոտ բողոքի ակցիա անցկացրին: Խնդիրը Երևանում մեկնարկած Սևծովյան տնտեսական համագործակցության կազմակերպության արտաքին գործերի նախարարների հավաքին ներկա Թուրքիայի արտգործնախարար Ահմեդ Դավութօղլուի այցն է:
ՀՅԴ «Նիկոլ Աղբալյան» ուսանողական միության վարչության ատենապետ Գերասիմ Վարդանյանը նշեց, որ ակցիային մասնակցում են երիտասարդներ, ովքեր տեր են իրենց երկրին, պահանջատիրությանը: Թուրքիայի երիտասարդությունը թող գիտակցի, որ Հայոց ցեղասպանությունը չի մոռացվել, չի մոռացվելու, և Թուրքիան պարտք ունի, անկախ նրանից՝ հարյուրամյակը կանցնի՞, թե՞ ոչ:
«Թուրքիան և թուրք ժողովուրդը պետք է գիտակցեն, որ օր առաջ պետք է ճանաչել Հայոց ցեղասպանությունը: Սա ազգային հարց է, ո՛չ քաղաքական կամ սոցիալական: Ոչ մի երկխոսություն, ոչ մի սառույց. մենք պահանջատեր ենք, ոչ մի երկխոսություն: Մենք դեմ ենք նախապայմաններով հարաբերությունների սկսմանը, հայ-թուրքական արձանագրություններին»,- ասաց նա:
Դավութօղլուն, սակայն, հյուրանոց մտավ հետնամուտքից: Ցուցարարները ամոթանք տվեցին նրան. «Ամո՛թ, վախեցար դուրս գալ պատմության հետ առճակատման»:
Գերասիմ Վարդանյանը նշեց, որ քանի դեռ Թուրքիան չի ճանաչել Հայոց ցեղասպանությունը, դրա հատուցման եղանակները, Թուրքիան և թուրք իշխանավորները միշտ էլ հետնամուտքերով, փախեփախ են ման գալու:
«Վաղ թե ուշ, եթե մենք չհասանք՝ մեր թոռները զենքով են հասնելու մեր իրավունքների պաշտպանությանը: Եթե միջազգային հանրությունը չպաշտպանեց, մենք զենքով կստանանք մեր հողերը»,- ասաց նա:
