Քիչ առաջ Երևանի «Մետրոպոլ» հյուրանոցում մեկնարկեց Հայաստանում Եվրոպական միության պատվիրակության և Արևելյան գործընկերության Քաղաքացիական հասարակության ֆորումի Հայաստանի ազգային պլատֆորմի կողմից համատեղ կազմակերպված՝ «Եվրոպական ինտեգրացիա-2013. ԵՄ-Հայաստան հարաբերությունների հեռանկարները Արևելյան գործընկերության վիլնյուսյան գագաթնաժողովից հետո» թեմայով երկօրյա համաժողովը: Համաժողովը վարող Բորիս Նավասարդյանը խոսքը փոխանցեց ՀՀ նախագահի աշխատակազմի ղեկավար Վիգեն Սարգսյանին, ով իր ելույթը սկսեց «Հայաստանի ազգային պլատֆորմ»-ից շնորհակալությամբ՝ ասելով, որ այն նպաստել է ՀՀ-ի՝ Եվրոպայի հետ անցած ճանապարհին և ապագայում էլ նպաստելու է: Նրա համոզմամբ՝ այդ ճանապարհը նույնը չէր լինի, եթե ՀՀ-ն չզգար քաղաքացիական հասարակության աջակցությունը՝ շնչառությունը:
Ապա անդրադառնալով Հայաստանի եվրոպական ուղուն՝ Վիգեն Սարգսյանն ասաց, որ ՀՀ-ԵՄ համագործակցության ձևաչափում ընկած են ընդհանուր արժեքներով ապրելու ու զարգանալու տեսլականը և այդ արժեքների հիման վրա եվրոպական ընտանիքի հետ առավել սերտ և ընդլայնված հարաբերությունների կառուցումը:
Նախագահի աշխատակազմի ղեկավարն իր խոսքում հիշեցրեց նաև ՀՀ նախագահ Սերժ Սարգսյանի՝ Վիլնյուսում արած հայտարարությունը, համաձայն որի՝ Հայաստանը վճռական է՝ շարունակելու հարաբերությունների զարգացումը Եվրոպայի հետ և իրականացնելու բարեփոխումներ:
Նրա գնահատմամբ՝ ՀՀ նախագահի այդ խոսքերը փաստում են, որ ՀՀ-ն, ի դեմս Սերժ Սարգսյանի, Վիլնյուսում վերահաստատեց ԵՄ-ի հետ ՀՀ երկխոսության այն մասը, որը վերաբերում է ՀՀ պարտականություններին: Վիգեն Սարգսյանը նշեց, որ ՀՀ իշխանության օրակարգում են և առաջնահերթությունն են այս ուղղությամբ բոլոր գործընթացները, որոնք իրականացվելու են անշեղորեն և լիարժեք:
«Հայաստանի մասնակցությունը եվրոպական ընտանիքին մերձեցնող ձևաչափերում Հայաստանի գիտակցված և աներկբա ընտրությունն է՝ թելադրված քաղաքական և մշակութային ինքնությամբ: Մաքսային միությանն անդամակցելու որոշումը խմբագրեց, բայց չբեկանեց Հայաստան-ԵՄ հարաբերությունների օրակարգը»,- ասաց Վ. Սարգսյանը: Նրա խոսքով` կարևոր է, որ սա հասկանում են նաև իրենց եվրոպացի գործընկերները:
ՀՀ նախագահի աշխատակազմի ղեկավարը վստահեցրեց, որ ՀՀ-ն շարունակելու է իր համագործակցությունն Արևելյան գործընկերության շրջանակում և հետևողական առաջ է մղելու բարեփոխումների գործընթացը: Նրա գնահատմամբ՝ հաջորդ տարին Արևելյան գործընկերության հետագա զարգացման համար լինելու է շրջադարձային՝ նոր լուծումների և համագործակցության նոր մոդելների որոնման տեսանկյունից: Նրա դիտարկումներով՝ Ասոցացման համաձայնագրի չնախաստորագրումը չպետք է նվազեցնի Եվրոպայի հետ մեր փոխգործակցության ձգտումը կամ ստվերի արդեն իսկ կատարված աշխատանքը:
«Մենք արդեն իսկ ունենք համատեղ ձեռքբերումներ: Այս գործընթացում ձևավորված մարդկային շփումները պետք է շարունակեն ծառայել երկրների հարաբերությունների հետագա զարգացմանն ու խորացմանը, որպեսզի ավելի ապահով և անվտանգ հարևանություն ձևավորվի»,- ասաց նա՝ հավելելով, որ այն, ինչ չի բավարարում Վիլնյուսից հետո, ճկունությունն է, ուստի հետվիլնյուսյան ժամանակաշրջանում առանցքային ուղերձը պետք է լինի ճկունությունը:
Միջազգային համաժողովի օրակարգում էր նաև ՀՀ ԿԳ նախարար Արմեն Աշոտյանի և ՀՀ-ում ԵՄ պատվիրակության ղեկավար Թրայան Հրիսթեայի խոսքը, սակայն նրանք չկարողացան մասնակցել համաժողովի բացմանը, որի արդյունքում միանգամից սկսվեց համաժողովի ելույթների փուլը՝ կազմակերպությունների ղեկավարների ու փորձագետների մասնակցությամբ:
