Մադոննան գլխավորել է Forbes-ի վարկածով ամենաբարձր վարձատրվող երգչուհիների ամենամյա վարկանշային աղյուսակը: Պարբերականի հաշվարկներով՝ Մադոննան 2012-ի հունիսից 2013-ի հունիս ընկած ժամանակահատվածում աշխատել է 125 մլն դոլար: Երգչուհու եկամտի գլխավոր աղբյուրը եղել է նրա MDNA համաշխարհային շրջագայությունը, սակայն նրան բյուջեն ավելացնելու գործում օգնել է նաև Material Girl բրենդի ներքո հագուստի արտադրությունն ու օծանելիքի թողարկումը: 2012-ի վարկանիշում Մադոննան 9-րդ տեղում էր: Այս մասին հայտնում է Lenta.ru-ն:
Երկրորդ տեղում Լեդի Գագան է, որը հաշվարկվող ժամանակահատվածում աշխատել է 80 մլն դոլար: Նրա եկամտի հիմնական աղբյուրն է դարձել Born This Way Ball համերգային շրջագայությունը: Նշվում է, որ չեն հաշվարկվել նրա նոր՝ ARTPOP ալբոմից ստացված եկամուտները, քանի որ այն վաճառքի է հանվել նոյեմբերին:
Հիշեցնենք, որ ավելի վաղ Մադոննան ու Լեդի Գագան զբաղեցրել էին Forbes-ի վարկածով ամենաբարձր վարձատրվող երաժիշտների վարկանիշի առաջին և երկրորդ տեղերը:
Նոր վարկանիշի երրորդ տեղում Թեյլոր Սվիֆթն է՝ 55 մլն դոլար տարեկան եկամտով: Չորրորդ և հինգերորդ տեղերում Բեյոնսեն ու Ջենիֆեր Լոպեսն են՝ համապատասխանաբար 53 և 45 մլն դոլար եկամտով:
