Ռուսաստանի մանկավարժները որոշել են օգնել ուսուցչուհուն, ում հեռացրել էին Օմսկի դպրոցներից մեկից՝ լողազգեստով լուսանկարի համար։ Ուսուցիչներն իրենց ակցիան սկսել են Instagram-ում։
Ուսուցչուհիները սկսել են հրապարակել սեփական լուսանկարները լողազգեստերով, խալաթներով և ներքնազգեստով՝ ի պաշտպանություն Վիկտորյա Պոպովային, իրենց գրառումները ուղեկցելով՝ #ուսուցիչներնէլենմարդ հեշթեգերով։ Ակցիային մասնակցել են ուսուցիչներ ողջ Ռուսաստանից։ Ընդ որում, նրանցից ոմանք նկարներ են հրապարակել այլ երկրներից, քանի որ հիմա արձակուրդում են գտնվում հանգստավայրերում։
Օմսկից մանկավարժ Օլգա Երմոլենկոն իր գրառման մեջ հայտարարել է, որ համառուսական ակցիայի գաղափարն իրենն է։ «Ես առաջին մասնագիտությամբ լրագրող եմ։ Երկրորդ դիպլոմս մարքեթինգի կառավարումն է։ Բայց իզուր չէ, որ չորս տարի դասավանդել եմ Օմսկի պետական համալսարանում»,– գրել է ուսուցչուհին։
Ավելի վաղ Օմսկի դպրոցներից մեկի պատմության ուսուցչուհուն՝ Վիկտորյա Պոպովային հեռացրել էին դպրոցից՝ լողազգեստով նկարի համար, որոնք նա հրապարակել էր սոցկայքերից մեկում։ Ուսումնական հաստատության ղեկավարությունը որոշել էր, որ «ուսուցչուհին վնաս է հասցրել դպրոցի վարկանիշին», այդ պատճառով էլ նրան ստիպել են ազատման դիմում գրել։
