Կոտայքի նորանշանակ մարզպետ Ռոմանոս Պետրոսյանը ուրբաթ օրը կհանդիպի «Լուսակերտի տոհմային թռչնաբուծական ֆաբրիկա» ՍՊԸ նորանշանակ տնօրենի և աշխատակիցների հետ՝ ֆաբրիկայում կրճատումների հարցին լուծում տալու համար: «Արմենպրես»-ի հետ զրույցում Ռոմանոս Պետրոսյանն ասաց, որ բնակիչների բողոքի ձայնի հիման վրա ժամանել է թռչնաֆաբրիկա, որտեղ շուրջ 50 աշխատակիցներ բողոքի ակցիա էին կազմակերպել կրճատումների դեմ: «Հիմնականում բանակցությունները տարվել են այն ուղղությամբ, որ և քաղաքացիների շահերը որևէ կերպ չոտնահարվի և նաև ի նկատի առնենք թռչնաֆաբրիկայի սեփականատերերի կարիքները»,-ասաց նա, հավելելով, որ ֆաբրիկայի տնօրինությանը 4 օր ժամանակ է տրվել առողջացման ծրագիր ներկայացնելու համար:
«Լուսակերտի տոհմային թռչնաբուծական ֆաբրիկա» ՍՊԸ աշխատակիցները հունիսի 12-ին բողոքի ակցիա են իրականացրել՝ ընդդեմ ընկերությունում մի քանի տասնյակ աշխատակիցների կրճատման:
Տեղեկություններ կան, որ Կոտայքի մարզի Նոր Գեղի համայնքում գործող «Լուսակերտի տոհմային թռչնաբուծական ֆաբրիկա»-ն ֆինանսական խնդիրներ ունի: Ֆաբրիկայի նոր տնօրենը, ով հինգ օր է նոր պաշտոնում է, արդեն հասցրել է աշխատանքից ազատել ֆաբրիկայի մի քանի տասնյակ աշխատակիցների:
Ֆաբրիկան արդեն վերադարձել է իր բնականոն աշխատանքին, աշխատակիցները դադարեցրել են բողոքի ակցիան: