Դեկտեմբերի 10-ին գումարված արտահերթ նիստում Երևանի ավագանու հաստատմանն են ներկայացվել Երևանի զարգացման 2014-2017թթ. քառամյա, ինչպես նաև 2014թ. միամյա ծրագրերը, որոնց հիմնական նպատակը, ինչպես այն ներկայացնելիս նշել է Երևանի քաղաքապետարանի աշխատակազմի զարգացման և ներդրումային ծրագրերի վարչության պետ Արմեն Հարությունյանը, քաղաքային տնտեսության զարգացման ուղղությունները նախանշելն է՝ հաշվի առնելով առկա հիմնախնդիրները, որոնք փաստաթղթերում ներկայացված են ըստ առանձին ոլորտների:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ ծրագրերի նախագծերը, ինչպես նշել է հիմնական զեկուցողը, անցել են օրենքով սահմանված բոլոր ընթացակարգերը, քննարկվել Երևանի քաղաքապետին կից, Երևանի քաղաքային համայնքի զարգացման քառամյա ծրագրի և տարեկան բյուջեի կառավարման խորհրդում, լրամշակվել են խորհրդի անդամների կողմից արված առաջարկություններով և ստացել խորհրդի դրական եզրակացությունը: Կազմակերպվել են նաև ծրագրերի նախագծերի հանրային քննարկումներ, այդ թվում՝ շահագրգիռ անձանց հետ հանրային բաց լսումների եղանակով:
Ծրագրերի նախագծերը նաև ավագանու գլխադասային հանձնաժողովների դրական եզրակացությանն են արժանացել:
Քննարկման արդյունքում Երևանի ավագանին գրանցված 56 անդամների քվեարկությամբ՝ ձայների 50 կողմ և 6 դեմ հարաբերակցությամբ, հաստատեց Երևանի զարգացման քառամյա և գրանցված 55 անդամների քվեարկությամբ՝ ձայների 49 կողմ և 6 դեմ հարաբերակցությամբ, Երևանի զարգացման 2014թ. ծրագրերը:
Երևանի ավագանին միաձայն կողմ քվեարկությամբ որոշել է գույքահարկի արտոնություն սահմանել Հայրենական մեծ պատերազմի վետերանների, Արցախյան և Աֆղանստանի պատերազմներում զոհվածների, ինչպես նաև Հայաստանի Հանրապետության և Լեռնային Ղարաբաղի պաշտպանության մարտական գործողությունների ընթացքում վիրավորված և ստացած վնասվածքներից հաջորդող տարիների ընթացքում մահացածների ընտանիքների, ինչպես նաև Արցախյան և Աֆղանստանի պատերազմների 1-ին և 2-րդ խմբի զինհաշմանդամների համար, որոնք գույքահարկով հարկվող օբյեկտ համարվող բնակելի նշանակության շինությունները ձեռք են բերել կամ դրանցում հաշվառվել են մինչև սույն որոշման ուժի մեջ մտնելը:
Երևանի ավագանին գույքահարկի արտոնություն է սահմանել նաև Հայաստանի նկարիչների միության անամ նկարիչներին սեփականության իրավունքով պատկանող` գույքահարկով հարկվող օբյեկտ համարվող, Երևան քաղաքի վարչական տարածքում գտնվող շինությունների՝ ստեղծագործական արվեստանոցների մասով:
Երևանի ավագանին սահմանել է նաև Երևանի քաղաքային համայնքում տեղական տուրքերի և վճարների 2014 թվականի դրույքաչափերը:
Ավագանին սահմանել է նաև Երևանի քաղաքային համայնքի վարչական տարածքում ծառայողական ավտոկայանատեղերի կազմակերպման կարգը: Ծառայողական ավտոկայանատեղիների համար կսահմանվի ցուցանակի միասնական ձև, որտեղ նշված կլինեն կայանման պայմանները: Ծառայողական ավտոկայանատեղիների համար վճարվող գումարն ամբողջությամբ մուտքագրվելու է համայնքային բյուջե:
Երևանի ավագանին նաև որոշել է Երևան քաղաքի Փավստոս Բուզանդի 13-21 հասցեներում գտնվող` Երևան համայնքին սեփականության իրավունքով պատկանող 0.42 հեկտար հողամասը՝ դրա վրա գտնվող անավարտ շինարարության օբյեկտի հետ միասին, ներդնել «Դի Ընդ Էյջ գրուպ» սահմանափակ պատասխանատվությամբ ընկերության կանոնադրական կապիտալում` կնքելով անշարժ գույքի ներդրման և բաժնեմասերի շնորհի պայմանագրեր՝ Հայաստանի Հանրապետության կառավարության համապատասխան որոշմամբ նախատեսված «Երևան քաղաքի Փավստոս Բուզանդի 13-21 հասցեներում ձախողված կառուցապատման ծրագրից տուժած անձանց գույքային կորուստների վերականգնման» ծրագրով սահմանված հիմնական պայմաններով:
Նշված պայմանագրերի կնքման արդյունքում, ինչպես նշել է հիմնական զեկուցողը, կկարգավորվի Երևան քաղաքի Փավստոս Բուզանդի 13-21 հասցեներում ձախողված կառուցապատման ծրագրից տուժած անձանց գույքային կորուստների վերականգնման հարցը:
Արտահերթ նիստի օրակարգում ընդգրկված մյուս հարցերը նույնպես արժանացել են ավագանու հավանությանը:
