Twitter միկրոբլոգների ծառայության բաժնետոմսերի արժեքը դեկտեմբերի 9-ի արդյունքներով աճել է միանգամից 9.32 տոկոսով, ինչը թույլ է տվել, որ ընկերության կապիտալիզացիան հասնի 26.77 մլրդ դոլարի: Այս մասին հայտնում է Lenta.ru-ն:
Այսպիսով, Twitter-ը սկսել է ավելի թանկ արժենալ մեկ այլ համացանցային հսկա LinkedIn-ից, որի բաժնետոմսերի արժեքը բարձրացել է 1 տոկոսից էլ քիչ, իսկ կապիտալիզացիան հասել է 26.32 մլրդ դոլարի:
Ներդրողները սկսել են գնել Twitter-ի բաժնետոմսերը՝ օգտատերերին գովազդ ցուցադրելու պրակտիկայում փոփոխությունների մասին միկրոբլոգների ցանցի հայտարարությունից հետո: Հաղորդվել է, որ նրանք կտեսնեն գովազդ, որն ընտրված կլինի դիտարկիչում պահպանված կայքերի այցելությունների պատմությունից ելնելով: