Ադրբեջանական 1news.az կայքի փոխանցմամբ՝ Թուրքիայի «Ազգայնական շարժում» կուսակցության (ԱՇԿ) նորաթուխ պատգամավոր, TÜRKSAM միջազգային հարաբերությունների և ռազմավարական հետազոտությունների կենտրոնի նախագահ Սինան Օղանը չի բացառել, որ վարչապետ Էրդողանի գլխավորած «Արդարություն և զարգացում» կուսակցությունը (ԱԶԿ) կարող է խորհրդարանի օրակարգ մտցնել հայ-թուրքական արձանագրությունների վավերացումը.
«Չեմ կարծում, որ ընտրություններից հետո որևէ լուրջ փոփոխություններ տեղի ունենան Ադրբեջանի հետ կապված Թուրքիայի քաղաքականությունում։ Սակայն դրա հետ մեկտեղ, չեմ բացառում, որ իշխող կուսակցությունը կարող է խորհրդարանի օրակարգ մտցնել Ցյուրիխում ստորագրված հայ-թուրքական արձանագրությունների վավերացման խնդիրը։
Ամեն դեպքում, եթե դա տեղի ունենա, ես՝ որպես խորհրդարանական, կտրուկ կարտահայտվեմ այդ հարցի քննարկման դեմ՝ նախքան Ադրբեջանի «օկուպացված» տարածքների ազատումն ու ղարաբաղյան հակամարտության կարգավորումը։
Ինչ վերաբերում է տվյալ հարցում Էրդողանի դիրքորոշմանը, որը նախընտրական շրջանում բազմիցս արտահայտվել է Ադրբեջանի տարածքային ամբողջականության օգտին և անգամ կարգադրեց վերացնել Կարսի՝ հայ-թուրքական բարեկամությունը խորհրդանշող հուշարձանը, Սինան Օղանը նկատեց, որ ԱԶԿ նախընտրական մարտավարության մի մասը միտված է եղել թուրքական ազգայնական ընտրազանգվածն իր կողմը գրավելուն։
Այժմ ընտրություններն անցել են, և կառավարության ձեռքերը կապված չեն։ Կարծում եմ, որ ինչ-որ պահի հայ-թուրքական արձանագրությունների վավերացումը նորից կդառնա այժմեական»։
Հիշեցնենք, որ Ադրբեջանը հրաժարվեց մասնակցել հունիսի 8-ին Թուրքիայի Կայսերի քաղաքում Nabucco գազատարի համաձայնագրի կնքմանը, ինչը (և ընդհանրապես Ադրբեջանի էներգետիկ ռեսուրսները) թուրքական կողմի համար առավել առաջնահերթ է համարվում, քան ղարաբաղյան հակամարտության կարգավորումը։
Նշվում է, որ Ադրբեջանը Nabucco-ին մասնակցելու հարցում իր պատասխանը ներկայացնելու է այս տարվա հոկտեմբերին։ Եվ եթե բացասական պատասխան տա, ապա չպետք է բացառել, որ թուրքական խորհրդարանում նորից կարդիականանա հայ-թուրքական արձանագրությունների վավերացման խնդիրը։
Էրդողանն արդեն իսկ որոշակի ազդանշան է ուղարկել Ալիևին՝ խորհրդարանական ընտրություններից հետո առաջին արտասահմանյան այցի ընտրության հարցում Ադրբեջանի փոխարեն նախապատվություն տալով Եգիպտոսի տարբերակին։
