Թուրքիայի նախագահ Ռեջեփ Թայիփ Էրդողանը հայտարարել է, որ քրդամետ Ժողովրդադեմոկրատական կուսակցության նախկին համանախագահ, կուսակցությունից նախագահի թեկնածու Սելահաթթին Դեմիրթաշը բարոյական իրավունք չունի ընտրություններին երկրի նախագահի պաշտոնում առաջադրվելու համար, գրում է Sputnik-ի թուրքական ծառայությունը։
«Բանտում նստած մեկը որոշում է նախագահի թեկնածու դառնալ, դու ի՞նչ երեսով ես թեկնածություն դնում», – ասել է Էրդողանը։
Նա նաև քննադատել է նախագահի մյուս ընդդիմադիր թեկնածուներին, որոնք պնդում են, թե Դեմիրթաշը պետք է դուրս գա բանտից ու նախընտրական քարոզարշավ իրականացնելու իրավունք ստանա։
«Սրանց արդարադատության մասին պատկերացումները հազիվ այսքանն են։ Ժողովրդավարությունը դա չէ, քաղաքականությունը դա չէ։ Այս երկիրն այրեն, ավերեն, հետո ասեք՝ «Թող դուրս գա»։ Նման բան չի կարող լինել», – ասել է Էրդողանը։
Թուրքիայի նախագահը նաև վստահություն է հայտնել, որ նախագահական ընտրությունները կավարտվեն առաջին փուլով, և երկրորդ փուլ կազմակերպելու հարկ չի լինի։
