ՌԴ Պետդումայի նախագահ Սերգեյ Նարիշկինը պետական ծառայողների համար առաջարկել է մտցնել պարտադիր քննություն՝ երկրի Հիմնական օրենքի իմացության վերաբերյալ: Այս մասին ասել է Պետդումայի խոսնակի մամլո քարտուղար Եվգենյա Չուգունովան: Գաղափարը պաշտպանել են նաև Կրեմլում և կառավարությունում:
Ինչպես հայտնում է «Իզվեստիա»-ն՝ քննություն սահմանելու դեպքում ուսումնական ծրագիրը կմշակի Սերգեյ Շախրայը, ով 1990-ականներին զբաղեցնում էր փոխվարչապետի պաշտոնը: Նա Սահմանադրական դատարանում նախագահի լիազոր ներկայացուցիչն էր: Իսկ ամենակարևորը՝ Շախրայը եղել է նաև գործող Սահմանադրության հիմնական մշակողներից:
Նա հայտարարել է, որ կես տարվա ընթացքում պատգամավորները պետք է անցնեն Հիմնական օրենքի իմացության «որակավորման բարձրացում»:
«Իրավական տեխնոլոգիաներ» հիմնադրամի նախագահ Յուրի Սկուրատովի կարծիքով՝ վտանգ կա, որ քննությունը կարող է դառնալ ձևական: Ուստի կարևոր է թեստի ձախողման դեպքում սահմանել իրավական հետևանքներ:
