Շուրջ 5 ամիս ՅՈՒՆԻՍԵՖ-ի ու «Ընտանիքի ակադեմիա» հասարակական կազմակերպության կողմից Հայաստանի 4 մարզում իրականացվել է «Մանկաբույժ-ծնող՝ ձեռք ձեռքի փոքրիկի կողքին» իրազեկման ծրագիրը։ ՀԿ նախագահ Մերի Ներսիսյանը «Առաջին լրատվական»-ի հետ զրույցում ասաց՝ իրենց նպատակն է օգնելու մանկաբույժին ձեռք բերել նոր հմտություններ, որպեսզի կարողնա ավելի ճիշտ շփվել մյրիկների հետ։
«Առավելապես մարզերի մանկաբույժների համար չկա մի կառույց կամ չի կազմակերպվում սեմինար, որտեղ կսովորեցնեն մանկաբույժներին շփվել մայրիկների հետ և դառնալ նրանց համար հեղինակություն»,-ասաց նա։
Ծրագրի ընթացքում՝ 2017 թվականի հոկտեմբերից մինչև 2018 թ-ի ապրիլը վերապատրաստում է անցել 60 մանկաբույժ, իսկ ավելի քան 1200 ընտանիքի շրջանում իրականացվել է գիտելիքների, ինչպես նաև՝ ծնող-մանկաբույժ կապի գնահատում և ամրապնդում: Հայաստանի 4 մարզի 12 քաղաքում իրականացրած մինչև 2 տարեկան երեխաների առողջությանն ու խնամքին վերաբերող ծրագրի առանցքում մանկաբույժների վերապատրաստումն ու ժամանակին համընթաց գիտելիքների փոխանցումն է։
Մերի Ներսիսյանի փոխանցմամբ՝ ՅՈՒՆԻՍԵՖԻ և ՀՀ առողջապահության նախարարության հետ իրականացրած այս ծրագիրը շարունակական է լինելու. առաջիկայում նախատեսվում է սկսել երկրորդ փուլը։
