Էներգետիկայի և բնական պաշարների նախարար Արթուր Գրիգորյանը երեկ խորհրդարանում հայտարարել է, որ ինքը տեղյակ չէ, թե արդյոք կան քննարկումներ գազի ներտնային համակարգը վերացնելու ուղղությամբ, թե ոչ: Նա ասել է, որ այդ համակարգը, ամենայն հավանականությամբ, կշարունակի գոյություն ունենալ: Մենք գրել էինք, որ հայ սպառողները ի վերջո կազատվեն Կարեն Կարապետյանին և իր գազային կլանին տարիներ շարունակ հարկ վճարելու չափազանց նվաստացուցիչ ավանդույթից: Բայց նաև ավելացրել էինք, որ գազամատակարարման ներտնային համակարգի նկատմամբ վերահսկողությունը կարող է անցնել Արտակարգ իրավիճակների նախարարությանը:
Այն, որ Կարեն Կարապետյանը, զբաղեցնելով «ՀայՌուսգազարդ»-ի տնօրենի պաշտոնը, նոր հարկատեսակ է սահմանել հայ սպառողների համար, փաստ է: Նա ըստ էության զբաղվել է պետականորեն հովանավորվող ռեկետով, որովհետև սպառողները վճարել են մի ծառայության համար, որը, իրականում, նրանց չի մատուցվել: Բայց որևէ մեկը չի կարողացել հրաժարվել այդ ծառայությունից, որովհետև սպառնացել են գազամատակարարման դադարեցմամբ: Մարդիկ ստիպված են եղել հանդուրժել և վճարել, ինչպես հանդուրժել և վճարել են բազմաթիվ այլ ապօրինի վճարներ: Եթե անգամ այս ծառայությունը պետք է իրականացվեր մասնավոր ընկերության կողմից, ով է որոշել, որ դա պետք է լինի հենց AEG service ՍՊԸ-ն, ով է մրցույթ հայտարարել, և ով է որոշել մրցույթի հաղթողին: Հնարավոր է, որ մեկ այլ ընկերություն այդ նույն ծառայությունը մատուցեր անհամեմատ ավելի մատչելի ու ավելի որակով: Բայց Կարեն Կարապետյանը այդ ծառայությունը հորինել է, ոչ թե հայ սպառողների անվտանգության, այլ հարստանալու սեփական անհագ մոլուցքը բավարարելու համար: Դրա համար, իրենից բացի, որևէ մեկը չէր կարող դրանով զբաղվել:
Հայաստանի նոր իշխանությունը չի կարող հանդուրժել, որ այս ապօրինությունը անվերջ շարունակվի, ու նոր Հայաստանում ևս Կարեն Կարապետյանի ստեղծած կառույցները ապօրինի կողոպտեն հասարակությանը: Գազի ներտնային սպասարկում իհարկե պետք է, բայց դա կարող է արվել նաև պետության կողմից: Պետությունը կարող է ընդամենը ազգայնացնել ներտնային սպասարկում իրականացնող AEG service ըներությունը, այն դարձնելով արտակարգ իրավիճակների նախարարության մի ստորաբաժանում: Այս կազմակերպությունը այնքան գումարներ է յուրացրել հասարակությունից, որ դրա ազգայնացումը կարող է միանգամայն օրինաչափ դիտվել: Պետությունը նույնիսկ կարիք չի ունենա ինչ-որ գումար ծախսել այս ընկերության իրական սեփականատիրոջը, քանի որ այն գերշահույթը, որ ստացել է այս կազմակերպությունը, բազմակի անգամ ավելի է ընկերության իրական արժեքից:
Այնպես որ, նախարար Արթուր Գրիգորյանը անտեղյակության փոխարեն, պետք է նախաձեռնություն դրսևորի: Այլապես, եթե հասարակությունը պետք է շարունակի գազի ու էլեկտրաէներգիայի համար վճարել այնքան, որքան վճարում էր մինչև հեղափոխությունը, եթե սպառողները պետք է հարկադրված լինեն վճարել Կարեն Կարապետյանի սահմանած ապօրինի վճարները, այդ դեպքում ինչ տարբերություն, թե ով է ղեկավարում այդ նախարարությունը, և ընդհանրապես որևէ մեկը ղեկավարում է այն, թե ոչ:
